Dinamika e industrisë së shitjes me pakicë është e pashmangshme dhe ka gjithmonë sfida të reja me të cilat përballen bizneset e kësaj fushe. Përveç evolucionit teknologjik, që ndikon dukshëm në epërsinë e atyre që e përqafojnë shpejt, e shoqëruar kjo me bumin e dyqaneve në internet, edhe situata e pazakontë prej COVID-19 ka vënë në vështirësi shumë biznese të shitjes me pakicë në mbarë botën, gjë që ka çuar në mbylljen edhe të kompanive të mëdha. Kësaj nuk i ka shpëtuar edhe industria e shitjes me pakicë në vendin tonë dhe si pasojë shumë biznese të vogla janë mbyllur. Me shpresë se pandemia mund të jetë drejt fundit, kjo nuk do të thotë se biznesi i shitjes me pakicë nuk do të ketë shqetësime dhe sfida në të ardhmen, gjë që kërkon vëmendje nga pronarët dhe menaxherët për të shmangur dështimin. Por si mund të kuptohet se një biznes i shitjes me pakicë po përballet me vështirësi? Në ndihmë na vjen ekperienca dhe ekspertiza e Bob Phibbs, në shkrimin më poshtë, ku përshkruhen disa shenja që e tregojnë këtë. Si shitës me pakicë, duhet të jeni të vetëdijshëm për përgjëgjësinë tuaj dhe nxitja e besnikërisë së klientit dhe krijimi i një përvoje të paharrueshme blerjeje është në thelbin e tyre. Lexim të këndshëm!

* * * * *

Më kujtohet një mik i imi, që shkoi për të punuar për një rrjet dyqanesh elektronike. Ai bëri aty një punë të mrekullueshme dhe u promovua shumë herë. Për shkak se paga e secilit punonjës ishte e lidhur me sasinë e produkteve që shisnin dhe që nuk ishte e lehtë, shitësit e dinin se duhej të mësonin mirë produktet dhe të shkonin për t'i ndihmuar njerëzit. Nëse nuk i arrinin numrat e tyre të shitjeve, ata do të largoheshin nga puna.

 Në korrik të vitit 2000, kur drejtuesi i ri i kompanisë njoftoi se ata nuk do të shisnin më pajisje elektronike, shoku im e kuptoi se ishte koha për t'u larguar. Ata gjithashtu hoqën edhe komisionin për shitësit. Deri në vitin 2009 të gjitha dyqanet u mbyllën. 

Miku im u largua shumë kohë përpara se të ndodhnin këto. Por, pse shpesh punonjësit i shohin shenjat e rrezikut para pronarëve dhe menaxherëve? Sepse ata i shohin gjërat përmes lenteve të klientëve dhe pagesave të tyre.

Për t'ju ndihmuar të shihni shenjat tuaja të rrezikut, po ndaj me ju sot shtatë shenja rreziku, që i kam parë në bizneset e të gjitha madhësive. Nëse nuk ndërmerrni veprime, për të ndaluar ose ndrequr ato, këto rreziqe do të tejkalojnë biznesin tuaj.

7 Shenja rreziku, që biznesi juaj i vogël po bie

1.    Mbështetja tek zbritjet. Mendoni për markat më të këqija tani dhe unë jam i sigurt që do të mendoni për ato dyqane që ofrojnë zbritje me 40% pothuajse çdo fundjavë. Kur vazhdimisht i ulni çmimet, ju nuk po bëni gjë tjetër, veçse po dobësoni artikujt e shitjes dhe gjithashtu ju po i mësoni blerësit tuaj të blejnë vetëm kur çmimet shënojnë për poshtë. Kjo shkatërron marzhet dhe moralin.

2.    Treguesit e performancës po bien. Treguesi më i rëndësishëm, që gjithkush vazhdon ta shikojë, nga dyqanet më të vogla në ato më të mëdha është i thjeshtë, sa keni shitur më shumë këtë vit se një vit më parë? Ndërsa mund të keni një dyqan në internet dhe strategji të tjera për të tërhequr klientë tek ju, e vetmja gjë që me të vërtetë ka rëndësi është nëse ata blejnë nga ju. Një e vërtetë tjetër për dyqanin është që, numri mesatar i artikujve të shitur për klient duhet të rritet; ky është treguesi i vetëm që tregon se të punësuarit mund të ndikojnë më shumë. Natyrisht, nëse nuk keni një plan të qëndrueshëm trajnimi të punonjësve, ju vetëm po shpresoni që rritja do të vijë. Por shpresa nuk është një strategji.

3.    Qarkullimi i lartë i punonjësve. Punonjësit largohen nga menaxherët jo nga kompania. Kur një punë shihet si monotone, jo tërheqëse dhe e pa shpërblyer, punonjësit e mirë e gjejnë veten diku tjetër. Ju mund të kontrolloni biznesin tuaj për të parë se cilët punonjës të tanishëm dhe të mëparshëm vërtet po mendojnë për punën tuaj, por numri i punonjësve të larguar vitin e kaluar nuk duhet të jetë në rritje krahasuar me vitin e mëparshëm. Nëse ka rritje, atëherë punonjësit tuaj po largohen për shkak të stresit, ankthit dhe mërzitjes.

4.    Klientët nuk janë të rëndësishëm / Mungesa e Urgjencës. Një biznes që po lufton për mbijetesë i shikon blerësit si një pengesë në kryerjen e detyrave ose bisedave të tyre. Unë kam rastin e një mikun tim që lëviz në karrige me rrota, e që javën e kaluar hyri në një dyqan me prodhime druri, duke u afruar në banak për të kërkuar ndihmë. Djali që ishte aty, thjesht u përgjigj: "Jam pushim", dhe u largua. Gjëja më e çuditshme ishte që një punonjës tjetër e kishte ndihmuar atë disa ditë më parë. Por tani jo më. Kur punonjësit shfaqin sjellje të tilla, kjo tregon se askush nuk po e menaxhon dyqanin.

5.    Pronarët që nuk marrin pagë. Mora një kërkesë për konsulencë këtë javë nga një grua, biznesi i të cilës ishte në pozitë të vështirë. Ajo pyeste veten nëse ajo dhe partneri i saj i biznesit duhet të deklaronin falimentimin. Ata nuk kishin marrë para nga biznesi për dy vjet. Kjo e gjitha është e gabuar.

6.    Demoralizimi i punonjësve. Ishim duke punuar me një rrjet dyqanesh kafeje dhe kishim kaluar disa muaj duke zhvilluar versionin tonë të një produkti të ri. Ekipi u kujdes për të marrë opinione nga shumë njerëz, për të gjetur profilin e duhur të shijes. Gjatë fundjavës, para se të fillonim punën me produktin e ri, pronari tha se nuk e pëlqente shijen dhe kërkoi një ndryshim. Brenda 24 orëve, ekipi gjeti një mostër që i pëlqente pronarit, por askush tjetër nuk e pëlqeu. Lancimi dështoi në mënyrë spektakolare me klientët, të cilët u larguan dhe ekipi i prodhimeve të reja u demoralizua; pas kësaj, disa u larguan menjëherë.

7.    Shpenzime të larta për blerjen e klientëve të rinj. Në një kompani, studimi tregoi se për shitjen në internet ishte shpenzuar mesatarisht 196 dollarë, për secilin klient të ri. Edhe dyqanet me tulla dhe llaç shpesh kryejnë shitje dhe promovime për t’i nxitur blerësit që të hyjnë në derë, por nëse fatura juaj mesatare nuk mund ta mbështesë atë, ju s’po bëni gjë tjetër vetëm se po rrotulloheni në vend. Dhe është e vërtetë, pasi promovimi me humbje, vetëm që të hyjnë blerës në dyqan, është një mënyrë e provuar dhe e sigurt, që pa marzh, vetëm mund të shkatërroni fitimin. Dhe nëse stafi juaj i patrajnuar do të shesë vetëm artikujt me çmim të ulët apo me promocion, kjo e bën edhe më keq situatën.

 Me pak fjalë

Bizneset më të vogla shpesh herë do të këmbëngulin duke u justifikuar: “ne kemi ambientin tonë, kështu që ne kemi më shumë hapësirë për të manovruar” dhe madje edhe disa biznese më të mëdha e kanë parë pasurinë e tyre të patundshme si një mjet mbrojtje nga ulja e shitjeve. Por me këtë nuk mund të shkohet larg.

Thelbi i këtij shkrimi është të mos ja lejoni veten që ulja e treguesve të performancës të bëhet normë, ose që ekipi juaj është i mrekullueshëm, sepse ata jua thonë këtë.

Çelësi për ta çuar dyqanin tuaj në nivelin tjetër qëndron në atë se sa mirë vazhdoni të tregoni kujdes kundër këtyre shtatë shenjave paralajmëruese dhe t'i sfidoni ato me seriozitet.