Komunikimi është një nga aftësitë thelbësore sociale që kërkohet për çdo individ. Si njerëz ne kemi nevojë të bashkëveprojmë me njëri-tjetrin. Ajo që çdo bashkëveprim ka të përbashkët është nevoja për një komunikim të qartë dhe efektiv. Komunikimi në mënyrë efektive siguron që jo vetëm t’a përcillni mesazhin tuaj por edhe ndjenjat dhe emocionet tuaja tek të tjerët. Për menaxherët e sotëm, komunikimi i mirë luan një rol thelbësor në suksesin e tyre në vendin e punës dhe në jetën e tyre personale. Ju e dini tashmë se komunikimi në mënyrë efektive do të sjellë produktivitet më të lartë dhe marrëdhënie të përmirësuara në çdo aspekt të jetës tuaj. Një nga elementët më të thjeshtë të komunikimit është zotërimi i emocioneve dhe të menduarit përpara të folurit. Për ndihmë, ju sjellim sot shkrimin e Carol Morgan - Ph.D. në Komunikim, folëse televizive, trajnere dhe autore e fushës. Lexim të këndshëm!

* * * * *

Tani pranojeni. Më parë ju keni thënë gjëra që edhe sot dëshironi të mos i kishit thënë - dhe keni dashur t'i merrni përsëri mbrapsht. Sigurisht, të gjithë e kemi bërë, apo jo?

Është pjesë e natyrës njerëzore. Ndonjëherë ne bëhemi aq emocionalë për diçka, sa që harrojmë të mendojmë përpara se të flasim. Duket si diçka që e paralizon trurin tonë racional dhe logjik, dhe gjatë procesit, truri ynë emocional lejon që të dalin nga goja fjalë, që kurrë nuk duhet të kishin dalë.

Sidoqoftë, disa njerëz e bëjnë këtë më shpesh se të tjerët. Dhe nëse doni të mësoni se si të mendoni përpara se të flisni, jeni në vendin e duhur.

Por së pari, le të flasim për 11 arsyet, pse duhet të mendoni para se të flisni.

Disa njerëz mund të jenë mësuar nga prindërit e tyre të mendojnë përpara se fjalët të dalin nga goja e tyre. Por shumë të tjerë nuk e kanë bërë. Nëse jeni në këtë grup, atëherë duhet të mendoni seriozisht rreth këtyre arsyeve shumë të rëndësishme, pse duhet të mendoni përpara se të thoni diçka.

1. Fjalët tuaja pasqyrojnë kush jeni

Kur isha e vogël, nëna ime na mësoi, mua dhe motrat e mia, të mos përdornim fjalë sharje. Mendoja se ajo thjesht donte që ne të silleshim si zonja, por kishte një arsye edhe më të thellë.

Sigurisht, të sillesh si zonjë është një gjë e bukur. Por përtej kësaj, ajo po na mësonte që fjalët që përdorni përcaktojnë karakterin tuaj. Ato ndikojnë jo vetëm në veten tuaj, por edhe në mënyrën se si njerëzit ju perceptojnë dhe se çfarë lloj personi, mendojnë se jeni.

2. Fjalët kanë fuqi

Jam i sigurt që ju jeni të vetëdijshëm për lëvizjen gjuhësore politikisht të saktë. Në thelb është ndryshimi i fjalëve në ato më të këndshme.

Për shembull, përsëri në vitet 1970, njerëzit përdornin fjalën "i vonuar" për të përshkruar një person që ishte mendërisht më i ngadaltë se mesatarja. Por që nga ajo kohë, njerëzit kanë filluar ta përdorin atë si fyerje. Kështu që, me kalimin e kohës, ne kemi adoptuar fjalë dhe fraza të ndryshme si "nevoja të veçanta".

Çështja është se nëse i bëni fjalët më të këndshme, atëherë ato nuk do të përmbajnë aq shumë negativitet.

3. Fjalët mund të dëmtojnë (ose ndihmojnë) njerëzit

Siç e përmenda, fjalët kanë fuqi, dhe një pjesë e kësaj fuqie mund të jetë e mirë ose "e keqe". Ajo që i thoni një personi mund t’i dëmtojë ata — emocionalisht dhe mendërisht.

Dhe edhe pse ka një thënie: "Shkopinjtë dhe gurët mund të më thyejnë kockat, por fjalët nuk do të më lëndojnë kurrë", kjo nuk është e vërtetë - fjalët LËNDOJNË. Por ato gjithashtu mund të ndihmojnë. Pra, është e rëndësishme të siguroheni që fjalët që përdorni të ndihmojnë njerëzit në vend që t’i lëndojnë ata.

4. Emocionet mund t'ju bëjnë të thoni gjëra që as nuk i keni menduar

Jam i sigurt që ndonjëherë keni qenë i zemëruar me dikë dhe keni thënë diçka që e ka lënduar atë. Dhe pasi jeni qetësuar, keni menduar, "Oh zot, nuk e thashë me këtë qëllim".

E shihni! Kur jeni të zemëruar, zemërimi mbyll pjesën logjike të trurit tuaj dhe pastaj emocionet tuaja sundojnë vetveten. Dhe atëherë kur pjesa emocionale e trurit tuaj nuk vepron si filtër për fjalët tuaja, ju mund të thoni gjëra që as nuk i keni menduar.

5. Ju mund të keni supozuar diçka, nga ana e personit tjetër

Ju mund të mërziteni me dikë, sepse keni menduar se ai kishte qëllim t'ju lëndonte. Pastaj, si rezultat i kësaj, ju mund t'i kundërviheni atij.

Por jo të gjithë kanë ndërmend t’ju lëndojnë. Ndonjëherë, njerëzit thonë gjëra që interpretohen si e kundërta e asaj që synonin. Prandaj, sigurohuni që të flisni me ta për të parë se çfarë nënkuptojnë ata në të vërtetë, përpara se të supozoni.

6. Ju mund të bëni reagim të tepruar

Kur mendojmë se dikush tha ose bëri diçka të dëmshme për ne, emocionet tona priren të arrijnë majat. Instinkti ynë automatik është të shpërthejmë.

Por kjo fare mirë mund të jetë një reagim i tepruar. Siç e thashë më lart, në vend të kësaj duhet të siguroheni që ato që kanë thënë e justifikojnë shpërthimin tuaj emocional, sepse shpesh herë nuk e justifikojnë këtë.

7. Marrëdhënia juaj me njerëz të tjerë (ose situata) nuk justifikon fjalët tuaja

Është një gjë të shprehni zemërim ndaj vëllait ose motrës, mikut më të mirë ose bashkëshortit, por është tjetër gjë ta bëni këtë me shefin tuaj ose një epror tjetër. Ju duhet të vlerësoni nëse ajo që do të thoni është në përshtatje me llojin e marrëdhënies që keni me një person të caktuar.

Me të njëjtin argument, ju gjithashtu duhet të mendoni për situatën. Nëse jeni, të themi, në punë ose në një festë kompanie, atëherë është më mirë të mbani gojën mbyllur dhe të flisni më vonë.

8. Ju mund të gjykoni shumë ashpër

Shumë njerëz gjykojnë të tjerët përpara se të kenë dëgjuar të gjithë historinë. Është e lehtë të nxjerrësh konkluzione, të zemërohesh dhe të thuash gjëra që mund të jenë të vërteta ose jo.

Nëse automatikisht filloni të kritikoni dhe gjykoni një person tjetër, ai do të mbrohet. Dhe kur kjo ndodh, ajo pasohet nga më shumë negativitet dhe biseda (por edhe marrëdhënia) mund të bëhet e shëmtuar.

9. Fjalët mund të shkatërrojnë marrëdhëniet

Duke folur për marrëdhëniet, sa më shumë fjalë negative që i thuhen një personi tjetër me kalimin e kohës, aq më shumë i dëmton ata - dhe gjithashtu, edhe marrëdhëniet midis të dy palëve.

Mendoni pak - a do të donit të qëndronit me dikë që ju thërriste vazhdimisht me nofka e që nënkuptonin gjëra të këqia? Sigurisht që jo! Fjalët tuaja mund të shkatërrojnë marrëdhënien tuaj.

10. Fjalët mund të ndikojnë në veprimet e njerëzve të tjerë

Le të themi që jeni zemëruar me vajzën tuaj 10-vjeçare dhe e quani atë "bullafiqe" pa u menduar gjatë. Epo, kjo është diçka që ajo mund ta mbajë me vete për pjesën tjetër të jetës së saj, veçanërisht nëse e thoni shpesh.

Lehtësisht ajo mund të bëhet anoreksike, ose të zhvillojë ndonjë problem tjetër. Fjalët janë me veprim afatgjatë dhe ndikojnë në veprimet e njerëzve të tjerë.

11. Ju kurrë nuk mund ta ktheni mbrapsht atë

Sapo të thoni diçka, fjala ngelet atje përgjithmonë! Ju kurrë nuk mund ta merrni mbrapsht përsëri. Sigurisht, mund të provoni, por nuk do të funksionojë.

Të merrni përsëri mbrapsht atë që thoni është si të përpiqeni të fusni përsëri ajrin në një tullumbace – por nuk funksionon. Nuk ka rëndësi se sa përpiqeni, kjo nuk do ta ndryshojë faktin që ato fjalë janë atje - përgjithmonë.

Çfarë duhet të bëni tani?

Tani që i dini arsyet pse duhet të mendoni përpara se të flisni, si mund ta zgjidhni këtë? Për disa njerëz është më e lehtë, ndërsa për të tjerët është gati e pamundur.

Së pari, duhet të prisni të paktën 5 ose 10 sekonda përpara se të thoni diçka, veçanërisht kur ndiheni të mërzitur ose të zemëruar. Nëse nuk mund ta mbani gojën mbyllur, atëherë një alternativë është: të largoheni nga dhoma ose situata. Në këtë mënyrë, ju do të parandaloni veten të thoni ndonjë gjë, për të cilën do të pendoheni.

Kur ndaloni ose dilni nga dhoma, në ato pak sekonda, duhet të mendoni nëse keni një arsye të mirë për të folur.

A janë komentet tuaja të rëndësishme, të përshtatshme ose të dobishme? Nëse jo, mbase nuk duhet të thoni gjë.

Para se të flisni, merrni parasysh ndjenjat e personit tjetër. Si do të ndikojë tek ai? Besoni apo jo, do të ndikojë. Dhe nëse zbuloni që mund të thoni diçka që nuk do donit, atëherë duhet të kërkoni falje dhe të merrni përgjegjësi personale për veprimet dhe fjalët tuaja.

Dhe në fund, mos harroni të mësoni nga gabimet tuaja! Të gjithë kemi thënë gjëra për të cilat jemi penduar. Ndodh. Por ndryshimi midis njerëzve që mësojnë nga gabimet gjatë gjithë kohës dhe të tjerëve, është se ata tani dinë ta bëjnë më mirë këtë gjë.

Në përfundim

Nëse e keni të vështirë të mendoni përpara se të flisni, mos e fajësoni veten për këtë. Megjithatë, kjo nuk do të thotë që nuk duhet të përpiqeni për ndryshime pozitive.

Ndjeshmëria është thelbësore - mendoni se si fjalët tuaja ndikojnë tek të tjerët. Ju dëshironi të keni një ndikim pozitiv mbi njerëzit e tjerë. Prandaj, sigurohuni që t’i zgjidhni fjalët tuaja me mençuri. Nuk do të pendoheni!