Komunikim! - duket sikur është shumë e thjeshtë: thoni atë që mendoni dhe të tjerët do ju kuptojnë. Por në fakt, ajo që shpesh ndodh është shumë ndryshe, ajo që përpiqemi të komunikojmë, humbet në përkthim, pavarësisht qëllimeve tona më të mira. Ne themi një gjë, personi tjetër dëgjon diçka tjetër, dhe keqkuptimet, frustrimi, dhe konfliktet pasojnë.

Për fat të mirë, komunikimi në mënyrë të qartë dhe efektive mund të mësohet.

Komunikimi efektiv është gur themeli për organizatat e suksesshme

Komunikimi efektiv është i rëndësishëm për drejtuesit e organizatave në mënyrë që të kryejnë funksionet themelore të menaxhimit, si, planifikimin, organizimin, drejtimin dhe kontrollin.

Komunikimi i ndihmon menaxherët për të kryer punët dhe përgjegjësitë e tyre. Komunikimi shërben si bazë për planifikim. Të gjitha informacionet e domosdoshme duhet t'i komunikohen menaxherëve, të cilët për rrjedhojë, duhet të komunikojnë planet dhe mënyrën si duhen zbatuar ato punonjësve. Organizimi gjithashtu kërkon komunikim efektiv me të tjerët, në lidhje me detyrat e tyre në punë. Në mënyrë të ngjashme, liderat si menaxherët, duhet të komunikojnë në mënyrë efektive me vartësit e tyre, në mënyrë që të arrijnë objektivat e ekipit. Kontrolli nuk është i mundur pa komunikim me shkrim dhe me gojë.

Menaxherët i kushtojnë një pjesë të madhe të kohës së tyre komunikimit. Atyre në përgjithësi u duhen rreth 6 orë në ditë për të komunikuar. Ata kalojnë një kohë të gjatë në komunikimin e ballë për ballë ose telefonik me eprorët, vartësit, kolegët, klientët ose furnitorët. Menaxherët përdorin edhe komunikimin me shkrim në formën e letrave, raporteve apo memorandumeve, kudo ku komunikimi me gojë nuk është i përshtatshëm.

Kështu, mund të themi se "komunikimi efektiv është një gur themeli për organizata të suksesshme". Me fjalë të tjera, komunikimi vepron si “gjaku organizativ”.

Rëndësia e komunikimit në një organizatë mund të përmblidhet si më poshtë:

1. Komunikimi nxit motivimin duke informuar dhe sqaruar punonjësit në lidhje me detyrën që kanë për të bërë, mënyrën se si ata do e kryejnë atë, dhe si mund të përmirësojnë performancën e tyre në qoftë se ajo nuk është në lartësinë e duhur.
2. Komunikimi është një burim informacioni për anëtarët e organizatës gjatë procesit të vendimmarrjes, ndërsa ndihmon identifikimin dhe vlerësimin alternativ të veprimeve.
3. Komunikimi gjithashtu luan një rol të rëndësishëm në ndryshimin e qëndrimeve individuale, dmth, një individ i informuar mirë do të ketë qëndrim më të mirë se sa një individ i painformuar. Revistat organizative, artikujt, takime dhe forma  të tjera të ndryshme komunikimi, të folur dhe të shkruar, ndihmojnë në dhënien formë të qëndrimeve të punonjësve.
4. Komunikimi gjithashtu ndihmon në shoqërizim. Në jetën e sotme, vetëm prania e një individi nxit komunikimin. Thuhet gjithashtu se njeriu nuk mund të mbijetojë pa komunikim.
5. Siç u diskutua më parë, komunikimi gjithashtu ndihmon në procesin e mbikqyrjes dhe kontrollit. Ai ndihmon për të mbikqyrur sjelljen e anëtarëve të organizatës, në mënyra të ndryshme. Ka nivele të ndryshme të hierarkisë dhe disa parime dhe udhëzime që punonjësit duhet të ndjekin në një organizatë. Ata duhet të jenë në përputhje me politikat organizative, të kryejnë rolin e tyre të punës, në mënyrë efikase, dhe të komunikojnë cdo problem pune dhe ankesë për eprorët e tyre. Kështu, komunikimi ndihmon në kontrollin e funksionit të menaxhimit.

Një sistem efektiv dhe efikas  komunikimi kërkon aftësi menaxheriale në dërgimin dhe marrjen e mesazheve. Një menaxher duhet të zbulojë pengesat e ndryshme të komunikimit, të analizojë arsyet për ndodhjen e tyre dhe të marrë masa parandaluese për ti shmangur ato. Kështu, përgjegjësia kryesore e një menaxheri është të zhvillojë dhe të mbajë një sistem efektiv të komunikimit në organizatë.