Si përmendet dhe në shkrimin këtu, kjo është pjesa e dytë që plotëson shkrimin e javës së shkuar, në të cilin autori Jeffrey Gitomer – Mbreti i shitjeve, u ofron disa ide e këshilla punonjësve të shitjes, për të qenë të suksesshëm duke paraqitur një propozim shitje profesional dhe efektiv, së pari, për klientin. Me përvetësimin dhe zbatimin e ideve këtu, punonjësit e shitjes mund të përmirësojnë shumë paraqitjen e tyre tek klientët e për rrjedhojë edhe rezultatet, duke u shfaqur si ekspertë të fushës. Edhe eksperti më i mirë në diçka, ka qenë dikur fillestar – na mëson Helen Hayes. Lexim të këndshëm!

  * * * * *

Propozimi për martesë dhe propozimi për shitje kanë shumë të përbashkëta. Të dyja kanë ato marrëdhëniet e fillimit që mund të jenë të ndryshme nga bota reale, të dyja duan përgjigjet "Po" dhe në të dy rastet, duhet të jetohet me pasojat pasi propozimi të jetë pranuar.

Në pjesën e parë (javën e kaluar), ne trajtuam Përgatitjen, Përmbajtjen dhe Formatin e një propozimi për shitje. Në këtë pjesë të fundit do të trajtojmë Stilin e shkrimit dhe Dërgimin e tij. (Pasojat e pranimit janë përgjegjësia juaj).

Pjesa e katërt: Stili…

Shkathtësia e përzgjedhjes të fjalëve të shitjes në një propozim është një pjesë integrale e procesit. Disa njerëz e kanë të vështirë të gjejnë fjalët e duhura. Jo sepse nuk dinë të shkruajnë, por sepse nuk i dinë rregullat e të shkruarit. Këtu janë disa rregulla dhe udhëzime shkrimi për të ndihmuar në shndërrimin e propozimit tuaj në një shitje:

1. Përdorni një titull para fillimin të tekstit për të shprehur objektivin tuaj.

2. Përdorni paragrafë të shkurtër (për theksim)

3. Ndryshoni, modifikoni, modifikoni. Hiqni çdo fjalë që nuk është pjesë përbërëse e qëllimit ose objektivit të komunikimit. Shmangni fjalitë e rënda. Gjysma e mbiemrave, gjysma e frazave parafjalore dhe shumica e ndajfoljeve mund të eliminohen. Shikoni pas presjeve për të parë nëse e gjithë fraza ia vlen të mbahet. Zakonisht nuk ja vlen.

4. Bëjeni propozimin të shkurtër. Sa më i shkurtër të jetë, aq më shumë shanse keni që propozimi të lexohet dhe të kuptohet.

5. Përdorni pikat për të thyer monotoninë. Ata e bëjnë propozimin të lehtë për t'u lexuar në mënyrë grafike.

• Përdorni pika për ta bërë propozimin të duket (ose të jetë) i shkurtër dhe i këndshëm.
• Përdorni pika për të theksuar çështjet më të rëndësishme.
• Shkallëzoni pikat.

6. Mos e shkruani emrin tuaj me shkronja të zeza, duke theksuar atë që është e rëndësishme për klientin. Emri juaj është ndër fjalët më pak të rëndësishme në propozim.

7. Theksoni (me të zeza) çështje për të tërhequr vëmendjen, por vetëm kur është absolutisht e nevojshme. Të theksoni fjalët që shprehin përfitim për klientin është shpesh zgjidhja më e mirë.

8. Redaktoni (pothuajse) të gjitha fjalët që përfundojnë me "isht".

9. Shmangni të shprehurin me superlativa.

10. Shmangni fjalën "unike".

11. Mos përdorni shprehje që tingëllojnë si të pamenduara.

12. Mos shkruani gabim asnjë fjalë. Një burrë shkroi gabim "patate" dhe e pagoi shtrenjtë, ndoshta me karrierë. Fatmirësisht ai nuk kishte një punë shumë të rëndësishme.

13. Përfshini surpriza shtesë – bashkëngjitni një artikull ose diçka që ka të bëjë me biznesin tuaj. Diçka që e bën klientin tuaj të mendojë se keni shkuar përtej normës për të shërbyer dhe komunikuar.

14. Shkruani një letër të mrekullueshme (të shkurtër dhe të këndshme) motivuese…

• Mos e bëni kandidatin të vjellë kur lexon letrën tuaj motivuese. Bëjeni letrën të lehtë për t'u tretur.
• Nëse arrini ta përmblidhni në një faqe do të jetë më efektive.
• Mos thoni "faleminderit për mundësinë", përkundrazi provoni "ne jemi krenarë të ofrojmë".
• Mos rishisni produktin tuaj por vetëm shisni hapin tjetër të veprimit në ciklin e shitjeve dhe ndërtoni njëfarë besimi dhe raporti. Mos e përdorni letrën si një prezantim shitje, thjesht përdoreni atë si një mjet shitje.
• Asnjëherë mos thuaj "përsëri, faleminderit". Nuk është e nevojshme të falënderoni askënd përsëri. Një herë është e mjaftueshme, dy herë është përulëse.
• Kërkoni përgjigje deri në një datë të caktuar.
• Përdorni një mbyllje të këndshme, jo lutje, profesionale si: “Faleminderit për kohën dhe konsideratën tuaj. Do t’ju telefonoj të martën”.
• Nënshkruani vetëm emrin tuaj. Është më miqësore.
• P.S. - Nëse doni të bëni një lutje ose të theksoni diçka dy herë, përdorni një P.S.

15. Duhet të lexohet si një libër. Duhet të jetë plotësisht e kuptueshme pa shpjeguar askush asgjë. Duhet të jetë bindëse. Nuk duhet të lexohet si kopje reklamuese, por si një mjet shitje. Një mjet kritik. Është propozimi juaj i riformuluar në letër.

Pjesa e pestë: Dorëzimi…

Kur është e mundur, dorëzimi personalisht është më i miri. Kjo është mënyra më e mirë për t'u siguruar që propozimi juaj do të bjerë në duart e klientit tuaj. Mendoni si për vete! A nuk do të të bënte përshtypje nëse ai propozim i rëndësishëm do t'ju dorëzohej personalisht?

Shërbimi postar (brenda qytetit) është i dyti. Dikush nga kompania juaj duhet të jetë zgjedhja juaj e parë. Nëse nuk e keni këtë mundësi, shërbimet postare janë të lira, të përshtatshme dhe të besueshme.

Posta me përparësi është e treta. Dokumenti vjen duke u konsideruar i rëndësishëm dhe urgjent. Ndonjëherë një ditë mund të bëjë të gjithë ndryshimin.

Posta normale është e fundit. Është e ngadaltë dhe jo e besueshme (përveç nëse përdorni postimin e shpejtë ose me prioritet). Nëse është një shitje e rëndësishme dhe e ndjeshme ndaj kohës, as mos mendoni ta dërgoni me postë. A keni ndonjë shitje që nuk është e rëndësishme?

Dhe tani, një rregull i rreptë. Gjeni dikë më të zgjuar dhe të paanshëm të kritikojë propozimin tuaj. Mësoni të pranoni kritikat dhe ta përdorni atë si një mjet mësimi.

Njohja e rregullave dhe praktikimi i tyre do të çojë në propozime efektive. Propozimet efektive janë rezultat i prezantimeve efektive të shitjeve. Propozimi duhet të jenë faktori përforcues, jo hap i shitjes. Propozimi duhet të dokumentojë atë që është thënë dhe rënë dakord. Propozimi duhet të konfirmojë shitjen. A e bën këtë propozimi juaj?