Ndërsa artikulli këtu fokusohet tek recepsionisti, nëse është ose jo një person që mund të rrisë shitjet, dhe pse jo - të ngrejë lart emrin e kompanisë, i njëjti këndvështrim mund të shtrihet mbi çdo person që merr kontakte me persona të tjerë, si brenda edhe jashtë saj. Çdo kontakt është një mundësi për të krijuar marrëdhënie, për të lënë përshtypje të mira e ndoshta edhe të paharrueshme, jo vetëm për veten por edhe për organizatën ku bën pjesë. Jeffrey Gitomer – Mbreti i shitjeve, e argumenton më së mirë këtë këndvështrim, duke dhënë edhe këshillat e tij të çmuara. Lexim të këndshëm!

* * * * *

Sapo kishim mbrritur në zyrat e një gazete biznesi në Honolulu, Havai. Misioni ynë ishte t'i propozonim atyre të botonin rubrikën time javore mbi aftësitë e shitjes. Ishim 10 minuta më herët.

Recepsionistja, me emrin Lin, dukej e lumtur që na pa. Morëm një përshëndetje shumë të ngrohtë, një ofertë për kafe dhe na dha botimin më të fundit të tyre. Gjithashtu na siguroi që personi që erdhëm të takojmë do të vinte në kohë dhe të mos shqetësoheshim. (Dhe mos harroni, ne po i shisnim atyre).

Unë dhe bashkëpunëtorja ime filluam të flisnim për një biznes tjetër që duhej të kontaktonim më vonë atë mëngjes. Një minutë më vonë, Lin na dha një letër të shkruar me emrin e kompanisë dhe numrin e telefonit. UAU! Kjo grua po na kushtonte vëmendje.

Filluam një bisedë shoqërore me Lin (nga jeni, me çfarë merreni etj.) Është e lehtë për njerëzit si ne, nga kontinenti, që të flasin se sa i mrekullueshëm është Havai, dhe Lin (një vendase e ishujve) u përfshi menjëherë në bisedë.

Pasi biseda u shua, Lin u kthye në punë (ashtu menduam) dhe ne po prisnim. Lin u rishfaq dhe i dhuroi bashkëpunëtores sime lule për flokët e saj. Ajo i kishte zgjedhur nga kopshti i saj atë mëngjes. UAU! (Dy uau në një hark 5-minutësh).

Duke u ndjerë vërtet "si në shtëpi", i thashë Lin - "Më trego pak për Tomin” (personin me të cilin do kishim takimin). "Oh, ai është shumë i këndshëm dhe i bën gjërat shumë të lehta" - tha Lin. "Do t'ju pëlqejë vërtet, të gjithë e pëlqejnë".

Pikërisht atëherë Tomi hyri në derë.

Në dhjetë minuta na kishin përshëndetur, na kishin ofruar kafe, na kishin dhënë një letër me një numër telefoni të një kontakti tjetër, na kishin dhënë lule, na kishin folur për personalitetin e personit që po përpiqeshim t’i shisnim dhe në përgjithësi na bënë të ndiheshim të veçantë. Recepsionistja kishte vendosur tonin për një takim pozitiv.

Si i trajton recepsionisti juaj mysafirët tuaj? A janë ata ambasadorë të vullnetit të mirë, apo indiferentë e të pakujdesshëm (madje të mërzitshëm) për vizitorët, veçanërisht për shitësit?

Si do të flasin njerëzit për ju, kur të largohen nga vendi juaj i biznesit? Nëse jeni të paharrueshëm, cili është ndikimi? Përvojat pozitive ritregohen. shpeshherë. Dhjetë herë nëse jeni vërtet i paharrueshëm. (Por llogarisni që ato negative ritregohen 25 herë).

Nëse recepsionisti le përshtypje UAU në 5 persona në ditë dhe ata e ritregojnë historinë e tyre 10 herë, kjo është 50 mesazhe pozitive për kompaninë tuaj në ditë, 250 në javë, 1,000 në muaj, 12,000 në vit! A nuk do të ishte mirë nëse 12,000 njerëzve ose bizneseve në vit do t'u thuhej se në çfarë vendi të mrekullueshëm ishin dhe se sa mrekullisht i trajtoi recepsionisti juaj? Sa shitje do të shkaktonte kjo sjellje e mirë? Plot.

Këtu janë 11.5 gjëra që ju (dhe recepsionisti juaj) mund të përdorni për të krijuar vullnetin e mirë - të diskutuar më sipër …

1. Bëjeni çdo mysafir të ndihet personalisht i mirëpritur. Një përshëndetje e këndshme, emri i tij ose i saj në një tabelë mirëseardhjeje, një distinktiv emri. Bëjeni të ftuarin të ndihet i rëndësishëm.

2. Bëjini çdo mysafiri një ofertë për diçka. Kafe, çaj, etj.

3. Dëgjoni atë që kërkohet ose thuhet. Mbani mend emrin, merrni kartvizitën dhe kujdesuni për nevojat e tyre.

4. Qëndroni në gatishmëri. Shpesh mysafirët kanë një orar të ngjeshur ose duan të jenë "në kohë". Kushtojini vëmendjen e menjëhershme dhe të plotë që meritojnë.

5. Dëgjoni ose bëni një bisedë nëse mysafiri/ët duhet të presin. Krijoni një mjedis miqësor.

6. Përgjigjuni. Merrni pjesë në një mënyrë që nuk është ndërhyrëse. Ofroni ndihmë nëse situata e kërkon atë.

7. Bëhuni burim informacioni. Jepni përshtypje dhe/ose informacion mysafirëve (pa shkelur asnjë besim të kompanisë).

8. Jini proaktiv. Parashikoni situatat. Bëni gjëra që e bëjnë të ftuarin të ndihet i veçantë.

9. Jini pozitiv. Mundohuni të gjeni një mënyrë për të ofruar rehati, në vend që të frikësoni. Mos i thyeni politikat e kompanisë suaj, por përshtatini ato aq sa të mundeni, në emër të ndërtimit të ndjesive të mira.

10. Ofroni qetësi. Nëse njerëzit janë duke pritur, kontrolloni statusin e tyre çdo disa minuta. Thuaju atyre se nuk do të duhet të presin edhe shumë kohë. Buzëqeshni. Ofroni ndonjë gjë tjetër. Buzëqeshni përsëri.

11. Bëhuni një ambasador për kompaninë tuaj. Kur mysafiri ulet në zonën tuaj të pritjes, ju (recepsionisti) jeni i vetmi përfaqësues i kompanisë që ai sheh. Ai ju sheh ju si një barometër për atë që ka brenda ambientit. Recepsionisti (ju) kontrollon motin. Bëjeni të duket si një ditë me diell.

    11.5  Bëhuni UAUU! Bëni diçka që e bën vizitën në kompaninë tuaj të paharrueshme. Nuk është e thënë të jetë diçka e madhe, ndoshta vetëm një lule, ose ndonjë biskotë e veçantë. Diçka për të cilën një mysafir do të flasë pasi të largohet.

Taktika e suksesit: Bëjeni të qartë se ju pëlqen ajo që bëni dhe jeni krenarë për kompaninë tuaj. Vendosni tonin e takimit në 5 sekondat e para. Nuk ka rëndësi nëse pala tjetër blen apo shet. Çdo person përcjell një mesazh jashtë.

Pasi përfunduam takimin tonë dhe u ndamë me Tomin, na duhej një taksi për në destinacionin tonë të ardhshëm. Ne pyetëm Lin se ku ishte më e lehtë për të marrë një taksi. Ajo tha, - "Uluni dhe do e njoftoj unë. Për pak do jetë këtu”.

Lin është një recepsioniste e jashtëzakonshme. Ajo kujdeset për biznesin e saj dhe njerëzit që e vizitojnë atë. Ajo krijon vullnet të mirë dhe një imazh pozitiv për kompaninë sa herë që dikush hyn në derë. UAU!

Po si ta gjej një recepsioniste të tillë? - do pyesni ju. Filloni me një person të lumtur, e më pas kujdesuni ta trajnoni dhe inkurajoni atë.