Ndryshimet dinamike të klimës së biznesit kanë nxitur interesin për trajnime të stafeve në tema të lidhura me menaxhimin dhe zhvillimin e lidershipit. Me synimin kryesor për zhvillimin profesional të punonjësve, shpesh vëmendja përqëndrohet në trajnime me tema mbi menaxhimin, ndërkohë që dalin jashtë fokusit temat e zhvillimit të lidershipit, duke nënkuptuar se janë pothuajse e njëjta gjë. Në fakt, ka ndryshime thelbësore ndërmjet tyre dhe asnjëra nuk bën dot pa tjetrën. Shkrimi më poshtë, ndihmon për të kuptuar këto ndryshime dhe për të nxjerrë në pah rëndësinë e trajnimit të secilës, për të ndërtuar ekipe të suksesshme e bashkëpunuese dhe koordinim më të plotë midis hallkave, me qëllim arritjen e objektivave të organizatës. Lexim të këndshëm!

* * * * *

Cili është ndryshimi midis Trajnimit të menaxhimit dhe Zhvillimit të lidershipit? Dhe pse duhet të tregoni kujdes për to?

Imagjinoni pak këtë situatë: është ora 7 pasdite e së premtes mbrëma pas një jave të gjatë dhe stresuese. Si drejtues i organizatës, ju duhet të miratoni buxhetin për tremujorin e ardhshëm dhe është shumë e qartë se diçka duhet ndryshuar.

Padyshim që nuk mund ta shtyni mirëmbajtjen e ndërtesës dhe shkurtimi i personelit nuk është një çështje për diskutim. Diku atje, në mesin e tabelës, ju shihni dy zëra që gabimisht mund të jenë përmendur dy herë - Trajnimi i menaxhimit dhe Zhvillimi i lidershipit. Me siguri ju mund të shkurtoni njërën prej tyre.

Cili është ndryshimi midis Zhvillimit të lidershipit dhe Trajnimit të menaxhimit - a nuk janë e njëjta gjë? Pse do t'ju duheshin të dyja? Dhe a nuk i shërbehet më mirë ekipit tuaj duke mësuar një program të ri kompjuterik sesa, të themi, të zbuloni llojin e personalitetit në një test?

Nëse kjo është një bisedë që e keni bërë me veten (ose me departamentin tuaj të financës), e kuptoj. Dhe nëse jeni shqetësuar ndonjëherë se po "shpenzoni dyfish" duke paguar për trajnime për menaxhimin e ekipit tuaj dhe zhvillimin e lidershipit, nuk jeni i pari që po pyesni veten për këtë.

Pra, cili është ndryshimi i Zhvillimit të lidershipit nga Trajnimi i menaxhimit (dhe pse ekipi juaj ka nevojë për të dyja)?

Trajnimi i menaxhimit është logjistik; Zhvillimi i lidershipit është psikologjik.

Një program tipik trajnimi për menaxhim mund të përfshijë tema si menaxhimi i performancës, komunikimi, zgjidhja e konflikteve, menaxhimi i kohës, etika, politikat dhe procedurat.

Ndërkohë, zhvillimi i lidershipit mbulon tema si mënyra se si mendësia dhe supozimet ushqejnë performancën, si ndikon lloji i personalitetit në stilin e lidershipit dhe komunikimit, dhe si mund t'i shfrytëzojmë këto lloje personaliteti për të udhëhequr në mënyrë efektive dhe për të ndërtuar ekipe të suksesshme.

Ose në terma pak më ndryshe:

Trajnimi i menaxhimit pa Zhvillimin e lidershipit është si instalimi i një grupi aplikacionesh në një telefon të zgjuar pa përditësuar sistemin operativ.

Aplikacionet mund të funksionojnë, por ato nuk do të funksionojnë shumë mirë ose shumë shpejt. Dhe në disa raste, ato nuk do të funksionojnë fare.

Imagjinoni një trajnim menaxherial se si të jepni reagime efektive. Nëse punonjësit tuaj nuk kanë bërë ndonjë trajnim mbi zhvillimin e lidershipit, ata mund të ndjekin skenarin se si të japin komente, por mënyra se si e bëjnë këtë mund të jetë ende joefektive. Nëse ata kanë tendenca përputhshmërie (të këndshëm, me ndjenjën e përkatësisë, pasivë) ata mund t’i veshin reagimet e tyre me nota pozitive dhe ta zbutin mesazhin.

Në mënyrë të ngjashme, nëse punonjësit tuaj kanë tendenca mbrojtëse (arrogancë, kritikë), ata mund të japin reagime në mënyrë tepër të ashpër dhe joproduktive.

Nëse punonjësit tuaj nuk e kanë të qartë dhe të kuptojnë mënyrën se si po e trajtojnë një çështje dhe se si egoja ose dëshira e tyre për të qëndruar të sigurt po ndikon në ofrimin e tyre, trajnimi i menaxhimit nuk do të funksionojë – dhe kjo është arsyeja pse zhvillimi i lidershipit dhe trajnimi i menaxhimit shkojnë dorë për dore.

E thënë ndryshe: efektiviteti juaj është shpesh 10% përmbajtje, 90% përcjellje.

Dhe për t'u kthyer te analogjia e telefonit të zgjuar: A duhet pak kohë për të përditësuar një sistem operativ? A jemi të gjithë të prirur ta shtyjmë për më vonë? A mundohemi ta justifikojmë nevojën për të dhe arrijmë të ecim përpara, duke performuar në 70% të asaj që jemi të aftë? Po, po, dhe po! Kjo vlen për telefonat tanë dhe për veten tonë.

Por kur marrim kohë për ta përditësuar atë, ne habitemi nga ndryshimi dhe sa më e shpejtë dhe më e lehtë është gjithçka.

Sa më shumë që dikush të përparojë në karrierën e tij, aq më shumë ata kanë nevojë për zhvillim lidershipi (dhe aq më shumë e dinë se kanë nevojë për të).

Në kohën kur dikush arrin në një nivel të lartë, ata kanë përballuar pjesën më të vështirë të sfidave logjistike dhe sistematike të lidershipit. Por ata kanë shumë më pak gjasa të kuptojnë se si po vetë-sabotohet ose pse vazhdojnë të punësojnë pa dashje "njerëz që thonë vetëm po" ose si ta bëjnë ekipin e tyre të japë reagime të sinqerta. Pikërisht në këtë pikë ata zbulojnë se ajo që i ka sjellë "këtu" nuk do t'i çojë domosdoshmërisht atje ku duan të shkojnë. Ata e dinë se kanë nevojë për më shumë se një trajnim tjetër për të ngritur vërtet nivelin e mendësisë dhe ekipeve të tyre.

Anëtarët e ekipit që mendojnë se punëdhënësit e tyre nuk po investojnë në rritjen e tyre kanë më shumë gjasa të largohen. Dhe qarkullimi i punonjësve është i shtrenjtë.

Një studim i para disa viteve, me 25,000 njerëz (në SHBA), zbuloi se punonjësit që nuk ndihen të mbështetur në qëllimet e tyre profesionale kanë tre herë më shumë gjasa të kërkojnë një punë të re. Dhe ju e dini se zëvendësimi i një punonjësi i kushton shumë një kompanie, e që rritet proporcionalisht për zëvendësimin e anëtarëve të lartë të ekipit.

Kur anëtarët e ekipit marrin zhvillimin e lidershipit që u nevojitet, ata ndihen të mbështetur dhe të investuar në të.

Dhe kur ndihen të mbështetur dhe të investuar, ka më shumë gjasa të qëndrojnë në punën e tyre. Dhe kur ata qëndrojnë në punët e tyre, ata mund të zbatojnë të gjitha gjërat që kanë mësuar në zhvillimin e lidershipit me ekipin e tyre, duke ndikuar në ndryshime pozitive në të gjithë kompaninë.