Duke diskutuar me drejtuesit e kompanive, gjatë konsulencave organizative dhe mbi Burimet Njerëzore, shpesh kemi trajtuar çështjen e angazhimit të punonjësve, si një tregues i qartë i shëndetit organizativ dhe kulturës së kompanisë. Një nga pyetjet tona është: Sa prej punonjësve tuaj shfaqin qëndrimin – “Kjo nuk është puna ime?” dhe pothuajse gjithmonë marrim një përgjigje jo me pak se 30%. Mungesë angazhimi tregojnë edhe qëndrimet “Unë bëj punën time, s’më duhet ç’bëjnë të tjerët” ose “Unë për kaq paguhem” etj. A jeni ju ndonjëri prej këtyre punonjësve apo keni në ekipin tuaj të tillë? Një analizë të shkurtër rreth kësaj çështje e gjeni në shkrimin këtu, thjesht si një tërheqje vëmendje jo vetëm për të menduar por edhe për të reaguar rreth saj. Lexim të këndshëm!

* * * * *

Mos angazhimi i punonjësve është një vrasës i heshtur i produktivitetit që mund të dëmtojë organizatën tuaj. Katër forca kontribuojnë në këtë problem dhe të gjitha janë të lidhura me mospërputhjen ose shpërfilljen e punonjësit dhe një prej tyre, këtu më poshtë: rolit, menaxherit, ekipit ose kulturës.

Dhe mospërputhja ose shpërfillja e çdonjërës prej këtyre forcave mund të ketë një ndikim shumë të dëmshëm në rezultatet tuaja.

1. Mospërputhja e rolit

Punësimet e reja shpesh dështojnë brenda 18 muajve, për shkak të praktikave të dobëta të punësimit. 46% e këtyre dështimeve rezultojnë nga vendosja e punonjësit në rolin e gabuar. Shumë menaxherë që bëjnë punësimin mbivlerësojnë treguesit kryesorë të përshtatjes me punën, si inteligjenca emocionale, motivimi dhe temperamenti, në favor të aftësive dhe eksperiencave. Ky hap i gabuar mund të rezultojë në mos angazhimin e punonjësve dhe qarkullimin e shpeshtë e të kushtueshëm të tyre.

2. Mospërputhja e menaxherit

Ndikimi i një menaxheri në angazhimin e punonjësve nuk mund të mbivlerësohet. Në fakt, 75% e punonjësve (në SHBA) e shohin menaxherin e tyre si pjesën më të keqe të punës së tyre. 65% e punonjësve madje do të pranonin një pagë më të ulët, vetëm për të ndryshuar shefin. Për fat të keq, vetëm 21% e punonjësve besojnë se menaxherët e tyre janë të aftë t'i motivojnë ata për të bërë punën e tyre në mënyrën më të mirë. Investimi në trajnimin dhe zhvillimin e menaxherëve është kyç për të siguruar përshtatshmërinë e tyre dhe për të parandaluar mungesën e angazhimit të punonjësve.

3. Mospërputhja e ekipit

Një ekip i pa angazhuar është një recetë për dështim. Mungesa e bashkëpunimit dhe një komunikim jo i efektshëm mund të ndikojë që 86% të punëtorëve të ndihen të pakënaqur. Raportimi ndër-funksional dhe ekipet gjeografikisht të shpërndara vetëm sa e përkeqësojnë problemin. Organizatat duhet të kenë prioritet punën në ekip dhe komunikimin për t'i mbajtur punonjësit e tyre të angazhuar dhe produktivë.

4. Mospërputhja e kulturës

Në zemër të angazhimit të punonjësve është dashuria dhe përkatësia, një nevojë themelore njerëzore, e theksuar kjo edhe në hierarkinë e nevojave sipas Maslow. Mungesa e kulturës së organizatës ose kultura toksike në vendin e punës mund të bëjë që punonjësit të ndihen të vetmuar, të lënë mënjanë, duke çuar në mos angazhim dhe një ndikim të dëmshëm në rezultatin tuaj.

Çfarë duhet bërë

Për të trajtuar mos angazhimin e punonjësve, organizatat duhet të matin të dhënat e njerëzve të tyre. Sondazhet mund të ndihmojnë në diagnostikimin e problemit, veçanërisht kur bëhet fjalë për kulturën. Kostot e mos angazhimit janë të larta, me humbjet që llogariten të jenë midis 450-550 miliardë dollarë në vit (në SHBA).

Punonjësit e pakënaqur bëjnë 37% më shumë mungesa në punë, 49% më shumë aksidente dhe 60% më shumë gabime dhe defekte. Organizatat me treguesit e ulët të angazhimit të punonjësve realizojnë një rendiment 18% më të ulët, një fitim 16% më të ulët dhe 37% më pak në volumin e punës.

Mos lejoni që kështu të jetë realiteti edhe në kompaninë tuaj. Merrni masa tani për t'u siguruar që punonjësit tuaj të jenë të angazhuar, të lumtur dhe produktivë.