Me kënaqësi po sjellim një shkrim, me autore Lauren Landry, mbi rolin Inteligjencën Emocionale (IE) në drejtim, pas kërkesës së një prej nga lexuesve të rregullt të blog-ut tonë. Ekspertët dhe studjuesit janë vazhdimisht në kërkim dhe zbulimet e tyre shpjegojnë çfarë do të thotë kjo aftësi dhe si mund ta përdorni, në ndihmë të suksesit tuaj. Lexim të këndshëm!

* * * * *

Aftësitë teknike që ndihmuan në arritjen e promovimit tuaj të parë në një pozicion menaxhimi mund të mos garantojnë ecurinë tuaj. Nëse aspironi ta mbani këtë rol drejtues, ka një element emocional që duhet ta keni parasysh. Kjo është ajo që ju ndihmon të trajnoni me sukses ekipet, të menaxhoni stresin, të jepni reagimet e duhura dhe të bashkëpunoni me të tjerët.

Quhet Inteligjencë Emocionale dhe është një nga aftësitë ndërpersonale më të kërkuara në vendin e punës. Në fakt, 71% e punëdhënësve e vlerësojnë Inteligjencën Emocionale më shumë se aftësitë teknike, kur vlerësojnë kandidatët.

Çfarë është Inteligjenca Emocionale (IE)?

Inteligjenca Emocionale përkufizohet si aftësia për të kuptuar dhe menaxhuar emocionet tuaja, si dhe për të njohur dhe ndikuar në emocionet e atyre që ju rrethojnë. Termi u shfaq për herë të parë në vitin 1990 nga studiuesit John Mayer dhe Peter Salovey, por më vonë u popullarizua nga psikologu Daniel Goleman.

Më shumë se një dekadë më parë, Goleman theksoi rëndësinë e inteligjencës emocionale në udhëheqje, duke thënë: “Udhëheqësit më të efektshëm janë pa diskutim të gjithë njësoj - Të gjithë kanë një shkallë të lartë të asaj që është njohur si Inteligjenca Emocionale. Nuk është se Inteligjenca e përgjithshme dhe aftësitë teknike janë të parëndësishme. Ato kanë rëndësi, por... ato janë kërkesa për nivelin e hyrjes në postet ekzekutive”.

Me kalimin e viteve, ka evoluar në një aftësi të domosdoshme. Hulumtimet tregojnë se IE është parashikuesi më i fortë i performancës. Punonjësit me IE të lartë kanë më shumë gjasa të ruajnë qetësinë nën presion, të zgjidhin konfliktin në mënyrë efektive dhe t'u përgjigjen kolegëve të punës me ndjeshmëri.

Si të identifikoni mungesën e Inteligjencës Emocionale

Mungesa kritike e aftësive emocionale mund të çojë në konflikt në vendin e punës, duke shkaktuar keqkuptime për shkak të pamundësisë për të dalluar ose kuptuar emocionet.

Një nga treguesit më të zakonshëm të IE të ulët është vështirësia në menaxhimin dhe shprehjen e emocioneve. Ju mund ta përmirësoni këtë duke pranuar shqetësimet e kolegëve në mënyrë të përshtatshme si dhe aftësinë e dëgjimit aktiv. Analizoni marrëdhëniet që keni me kolegët e punës.

• A janë të tendosura bisedat tuaja?
• A fajësoni vazhdimisht të tjerët kur projektet nuk shkojnë siç janë planifikuar?
• A jeni të prirur për shpërthime?

Nëse po, këto janë të gjitha shenja të mungesës së IE.

Është e rëndësishme të kultivohen aftësitë sociale duke kuptuar dhe praktikuar ndjeshmërinë dhe përbërësit kryesorë të IE.

4 Komponentët e Inteligjencës Emocionale

Inteligjenca Emocionale zakonisht ndahet në katër kompetenca thelbësore:

1. Vetë-ndërgjegjësimi
2. Vetë-menaxhimi
3. Ndërgjegjësimi social
4. Menaxhimi i marrëdhënieve

Për të përmirësuar IE-në tuaj, është e rëndësishme të kuptoni se çfarë përfshin çdo element. Ja një vështrim më nga afër i katër kategorive:

1. Vetë-ndërgjegjësimi

Vetë-ndërgjegjësimi është në thelb të gjithçkaje. Ai përshkruan aftësinë tuaj për të kuptuar jo vetëm pikat e forta dhe dobësitë tuaja, por për të njohur emocionet tuaja dhe efektin që ato kanë mbi ju dhe performancën e ekipit tuaj.

Sipas një hulumtimi të psikologes Tasha Eurich, 95% e njerëzve mendojnë se janë të vetëdijshëm, por në fakt, janë vetëm 10-15% dhe kjo mund të përbëjë problem për punonjësit tuaj. Puna me kolegët që nuk janë të vetëdijshëm mund të ulë shanset e suksesit të një ekipi deri në 50%, si dhe të shkaktojë rritjen e stresit dhe uljen e motivimit.

Për të nxjerrë më të mirën tek të tjerët, së pari, duhet të jepni më të mirën nga vetja juaj, dhe këtu është vendi ku hyn në lojë vetë-ndërgjegjësimi. Një mënyrë e lehtë për të vlerësuar vetë-ndërgjegjësimin tuaj është duke plotësuar vlerësimin 360 gradë, në të cilin ju vlerësoni performancën tuaj dhe pastaj e krahasoni atë me opinionet e shefit e kolegëve tuaj, si dhe raportet e drejtpërdrejta. Nëpërmjet këtij procesi, ju do të fitoni njohuri mbi sjelljen tuaj dhe do të zbuloni se si jeni perceptuar nga të tjerët në organizatë.

2. Vetë-menaxhimi

Vetë-menaxhimi i referohet aftësisë për të menaxhuar emocionet tuaja, veçanërisht në situata stresuese, dhe për të mbajtur një qëndrim pozitiv, pavarësisht pengesave. Udhëheqësit që nuk kanë vetë-menaxhim priren të reagojnë menjëherë dhe e kanë më të vështirë të mbajnë nën kontroll impulset e tyre.

Një reagim ka tendencë të jetë automatik. Megjithatë, sa më shumë të jeni në harmoni me inteligjencën tuaj emocionale, aq më lehtë mund ta bëni kalimin nga reagimi në përgjigje. Është e rëndësishme të mos harroni të ndaloni, të merrni frymë thellë, të mblidhni veten dhe të bëni gjithçka që duhet për të menaxhuar ndjenjat tuaja (e deri të bëni një shëtitje apo të bisedoni me një mik), në mënyrë që të mund t’i përgjigjeni në mënyrë më të përshtatshme dhe më të qëllimshme stresit dhe vështirësive.

3. Ndërgjegjësimi social

Edhe pse është e rëndësishme të kuptoni dhe të menaxhoni emocionet e tua, duhet të dini edhe të lexoni të tjerët. Ndërgjegjësimi social përshkruan aftësinë tuaj për të njohur emocionet e të tjerëve dhe dinamikën e lojës brenda organizatës suaj.

Udhëheqësit që shkëlqejnë në ndërgjegjësimin social praktikojnë ndjeshmërinë. Ata përpiqen të kuptojnë ndjenjat dhe pritshmërinë e kolegëve të tyre, gjë që u mundëson atyre të komunikojnë dhe të bashkëpunojnë më efektivisht me bashkëpunëtorët e tyre.

Ekspertët e lidershipit e konsiderojnë ndjeshmërinë si aftësia numër një e lidershipit, duke faktuar se udhëheqësit që zotërojnë ndjeshmëri performojnë +40% më lart në trajnimin gjatë punës (coaching), angazhimin e të tjerëve dhe në marrjen e vendimeve. Në një studim, studiuesit zbuluan se menaxherët që tregojnë më shumë ndjeshmëri në raportet e tyre të drejtpërdrejta shihen si interpretues më të mirë nga shefat e tyre.

Duke komunikuar me ndjeshmëri, ju mund të mbështesni më mirë ekipin tuaj, e duke përmirësuar kështu, performancën tuaj individuale.

4. Menaxhimi i marrëdhënieve

Menaxhimi i marrëdhënieve i referohet aftësisë suaj për të ndikuar, për të stërvitur dhe për të mentoruar të tjerët, si dhe për të zgjidhur konfliktin në mënyrë efektive.

Disa preferojnë t’i shmangin konfliktet, por është e rëndësishme që çështjet të trajtohen siç duhet, sapo ato lindin. Hulumtimet tregojnë se çdo konflikt i patrajtuar mund të shkaktojë rreth tetë orë humbje kohe, në shoqëri, në thashetheme dhe aktivitete të tjera joproduktive, e duke i dëmtuar burimet dhe moralit.

Nëse doni ta mbani ekipin tuaj të lumtur, duhet t’i bëni edhe këto biseda të vështira: Në një sondazh së fundmi, 72% e punonjësve e renditën “trajtimin me respekt të të gjithë punonjësve në të gjitha nivelet” si faktorin kryesor për kënaqësinë në punë.

Si Inteligjenca Emocionale mund t'i bëjë udhëheqësit më të efektshëm

Udhëheqësit i japin tonin organizatës së tyre. Nëse u mungon Inteligjenca Emocionale, kjo mund të sjellë pasoja të dëmshme, duke rezultuar në një angazhim më të ulët të punonjësve dhe një normë më të lartë qarkullimi.

Edhe pse mund të shkëlqeni teknikisht, nëse nuk mund të komunikoni në mënyrë efektive me ekipin tuaj apo të bashkëpunoni me të tjerët, herët a vonë aftësitë teknike do të anashkalohen. Duke zotëruar Inteligjencën Emocionale, mund të vazhdoni të përparoni me sukses, jo vetëm në organizatën tuaj.