Të kushtoni vëmendje ndaj ekipit të shitjes nuk ka të bëjë vetëm me kontrollin. Në këtë shkrim, autori Derrick S. Vormauor, e ve theksin tek motivimi i ekipit të shitjeve, si një element bazë në rritjen e kënaqësisë në punë të punonjësve të shitjes, përmirësimit të performancës dhe arritjen e objektivave dhe qëllimeve të organizatës. Nëse e dini se si të motivoni ekipin tuaj, atëherë do të keni rekrutim të suksesshëm, qarkullim më të ulët të punonjësve, shërbim më të mirë ndaj klientëve e për rrjedhojë klientë të kënaqur e besnikë, rritje të shitjeve dhe rritje të fitimeve të kompanisë. A nuk është ky qëllimi? Lexim të këndshëm!

* * * * *

Kohët e fundit, koncepti i Menaxhimit të Shitjeve ka evoluar. Nuk bëhet fjalë më vetëm për shitjen e një produkti apo shërbimi, por gjithashtu, shitjen e vlerës dhe më e rëndësishmja, shitjen e një marrëdhënieje dhe menaxhimin e stafit tuaj të shitjes. Konsumatorët dhe klientët blejnë nga markat dhe njerëzit që u besojnë, dhe kjo është arsyeja pse organizatat investojnë në punësimin e forcës së duhur të shitjes - duke u dhënë atyre trajnimin e duhur dhe objektiva realiste, për të arritur qëllime të caktuara nga shitja e që janë vendosur nga organizata.

Nëse i shikoni ndeshjet e futbollit, është e qartë se shpesh, ekipet e motivuara fitojnë dhe ekipet e demotivuara humbasin. Kjo është shumë e zbatueshme edhe në Menaxhimin e Shitjeve. Ekipet që janë shumë të motivuara priren të marrin rezultate më të mira krahasuar me ato që ju mungon motivimi. Nëse një ekip shitjesh nuk është i motivuar, ata shesin vetëm për të përmbushur objektivat e tyre, dhe kjo kryesisht bëhet dobët. Por ka edhe raste kur ekipet e demotivuara të shitjes nuk bëjnë përpjekje edhe kur shikojnë mundësi, e kjo ndikon tek organizata dhe gjithashtu tek klientët ku ata shërbejnë.

Në këtë epokë moderne, është e domosdoshme të pranohet se drejtimi i një biznesi është bërë shumë më tepër konkurrues dhe pritshmëria për drejtuesit, menaxherët dhe pronarët e bizneseve të shitjes po rriten vazhdimisht, sepse tashmë konsumatorët dhe klientët janë të ekspozuar ndaj shumë mundësive që ofron konkurrenca, e megjithatë duan më shumë se sa paguajnë.

Të punësohen profesionistët më të mirë nuk është gjithçka që duhet të bëhet kur synohet të ndërtohet një ekip i fortë shitjesh. Ashtu si foshnjat, ata do të duhet të ushqehen, të mbështeten dhe ç'është më e rëndësishmja, të motivohen për t'u bërë dhe për të qenë vazhdimisht më të mirët. Ekipet e shitjeve të motivuara sigurisht performojnë më mirë, i tejkalojnë objektivat dhe janë në gjendje të kuptojnë dhe vlerësojnë nevojat dhe pritshmëritë e klientëve.

Më lejoni ta trajtoj pak më shumë motivimin - në këtë kontekst.

Motivimi në shitje është shumë thelbësor. Fillimisht fjala "motiv" buron nga fjala latine m?t?vus që do të thotë “të lëvizësh”. Sipas studiuesve të shkencave të sjelljes, motivimi është një nxitës i rëndësishëm i sjelljes njerëzore. Kur një punonjës shitje është i motivuar, kjo ndikon edhe në perceptimin e tyre se çfarë shesin dhe si e shesin atë.

Ja çfarë është interesante - Njerëzit kanë evoluar dhe efekti i disa zhvillimeve të mrekullueshme shkencore ka ndikuar drejtpërdrejt në mënyrën se si njerëzit motivohen. Dhe këtu, ajo që na bën përshtypje të madhe është se shumica e drejtuesve të shitjeve ende nuk e kanë kapur realitetin në terren, kur bëhet fjalë për motivimin e ekipeve të shitjes në këtë epokë të re.

E duke folur për motivimin e stafeve të shitjes, po prekim këtu dy grupe kryesore të faktorëve të motivimit - Faktorët motivues të jashtëm dhe të brendshëm. Ju mund të gjeni informacion shtesë mbi secilin prej këtyre faktorëve dhe lidhjen e tyre me motivimin e ekipeve të shitjes. E po kështu mund të zbuloni më shumë rreth qasjeve më efektive për të motivuar ekipet e shitjes, si dhe të kuptoni ku duhet të përqendrohen menaxherët e shitjeve, kur punësojnë stafin e shitjes.

Megjithatë, e vërteta është se, pa motivim, njerëzit rrallë mund të arrijnë rezultate të mira. Ky motivim vjen ose nga brenda ose është i lidhur me faktorë të jashtëm. Nëse dikush nuk është i nxitur nga brenda për të realizuar objektivat, pra prej bindjeve të tij psikologjike dhe vlerave personale, atëherë nxitësit e jashtëm mund të mos japin rezultatet e duhura. E po kështu, ka persona që kur nuk inkurajohet nga faktorë motivues të jashtëm, ata mund të mos ndihen të nxitur për të dhënë rezultate të mëdha apo edhe për të tejkaluar objektivat.

Tani për tani, ju lë të mendoni pak rreth motivimit, duke ju kërkuar të reflektoni rreth ekipit tuaj të shitjeve dhe se si e keni menaxhuar atë kohët e fundit. A po u kushtoni vëmendje motivimit apo thjesht keni qenë shumë të zënë me punë?