Shtysa për të sjellë shkrimin e sotëm, me autor Matthew Reeves (me pak përshtatje nga ProspecTime) nuk ishte më shumë problematika e trajtuar sesa ato pak statistika të përfshira aty, mbi angazhimin e punonjësve. Nëse në SHBA, punonjësit e angazhuar janë 32% dhe të paangazhuarit 18%, a mund të thotë kush se si është situata tek ne? Ne mirëpresim komentet dhe mendimet tuaja, edhe nëse nuk mund t’i përgjigjeni kësaj pyetje. Nisur nga vlerësimet tona, nëpërmjet informacioneve të mbledhura në organizatat e biznesit, për qëllime të konsulencave organizative, mund të themi se këta tregues janë rreth dy herë më të dobët. E duke menduar se sa punë e madhe duhet bërë për të arritur në diskutimin dhe vlerësimin e angazhimit të punonjësve, ndoshta ju japim një nxitje për vitin 2024, të sigurt se angazhimi i punonjësve është vendimtar për suksesin e organizatës suaj, aq të dëshiruar nga ju. Lexim të këndshëm!

* * * * *

Sot, angazhimi i punonjësve është vendimtar në vendin e punës. Ai pasqyron shkallën në të cilën punonjësit bëjnë përpjekje në rolet e tyre, të angazhuar në misionin e kompanisë suaj dhe duke kontribuar aktivisht në suksesin e saj.

Megjithatë, hulumtimet e fundit nga Gallup tregojnë se vetëm 32% e punonjësve janë vërtet të angazhuar, ndërsa 18% janë qëllimisht indiferentë. Këto statistika theksojnë rëndësinë që ka mirëkuptimi dhe përmirësimi i angazhimit të punonjësve.

Çfarë është angazhimi i punonjësve?

Angazhimi i punonjësve mat se sa të investuar, të motivuar dhe të kënaqur janë punonjësit në kryerjen e detyrave të tyre dhe për organizatën tuaj në tërësi. Ai pasqyron shkallën në të cilën punonjësit janë të gatshëm të shkojnë më lart e më tej në rolet e tyre, të kontribuojnë aktivisht në suksesin e kompanisë dhe të përpiqen vazhdimisht për rritjen personale dhe organizative.

Termi "angazhim i punonjësve" nuk është thjesht e vetëm një fjalë pompoze, por angazhimi i lartë është vendimtar për suksesin e kompanisë suaj. Kur punonjësit tuaj janë plotësisht të investuar dhe të angazhuar në punën e tyre, kjo ndikon edhe tek të tjerët dhe ka një efekt pozitiv në shumë fusha të biznesit tuaj, duke përfshirë produktivitetin, mbajtjen dhe mirëqenien e punonjësve, dhe shumë më shumë.

9 objektivat kryesore të angazhimit të punonjësve për organizatën tuaj

Në ngritjen e një organizate të lulëzuar dhe të suksesshme, përcaktimi i objektivave të qarta të angazhimit të punonjësve është element thelbësor. Këto objektiva janë parimet udhëzuese që e lidhin fuqinë punëtore me misionin, strategjinë dhe qëllimet e organizatës.

1. Rritja e kënaqësisë së punës

Kompanitë që kanë prioritet kënaqësinë e punonjësve shpesh shohin nivele më të larta angazhimi. Kur ekipi juaj gjen përmbushje dhe kënaqësi në rolet e tyre, kjo rrit moralin dhe motivimin e punonjësve dhe kontribuon në një fuqi punëtore më të angazhuar dhe produktive.

Ka shumë mënyra për të rritur kënaqësinë në punë, duke përfshirë:

• Politikat e komunikimit të hapur: Krijoni një mjedis ku punonjësit ndihen mirë të ndajnë mendime, ide dhe shqetësimet e tyre. Inkurajoni sesione të rregullta shkëmbimi informacioni dhe dialogun e hapur.

• Besimi dhe fuqizimi i punonjësve: Jepuni punonjësve më shumë kontroll mbi punën e tyre, duke u mundësuar atyre të marrin vendime si dhe pronësinë për detyrat e tyre.

• Përfshirja në vendimmarrje: Nxisni ndjenjën e përkatësisë dhe fuqizimit mes punonjësve, në mënyrë që ata të ndjejnë se zëri i tyre dëgjohet dhe vlerësohet.

2. Përmirësimi i produktivitetit

Kompanitë mund të përmirësojnë efektshmërinë dhe prodhimin duke i angazhuar punonjësit në detyrat e tyre, duke minimizuar shpërqendrimet dhe duke rritur fokusin. Punonjësit e angazhuar shpesh janë më të motivuar, më të përfshirë dhe më entuziastë për rolet e tyre.

Për të rritur produktivitetin, largoni çdo bllokim nga rrjedha e punës së punonjësve tuaj. Kjo përfshin sigurimin e mundësive që ata mund të kenë qasje në burimet e nevojshme dhe teknologjinë e përditësuar, për të bërë punën e tyre në mënyrë efektive. Për shembull, nëse punonjësit tuaj mbështeten në programe që ngecin shpesh, kjo mund të ndikojë në aftësinë e tyre për të përfunduar detyrat dhe për të përmbushur afatet kohore. Përmirësimi i teknologjisë mund të heqë këtë bllokim dhe të përmirësojë rendimentin e tyre.

3. Ulja e qarkullimit të punonjësve

Punonjësit e lumtur dhe të angazhuar kanë më pak gjasa të kërkojnë mundësi punësimi diku tjetër, sepse gjejnë përmbushje dhe rritje brenda roleve të tyre aktuale. Kjo lidhje emocionale që ndjen një punonjës kur është shumë i angazhuar mund të çojë në një reduktim të normave të qarkullimit.

Nga ulja e normave të qarkullimit të punonjësve përfiton e gjithë organizata juaj, duke ulur kostot e rekrutimit dhe të trajnimit, duke ruajtur një fuqi punëtore më me përvojë dhe më të motivuar, e duke kontribuar përfundimisht në suksesin e saj afatgjatë.

Për të rritur mbajtjen e punonjësve, filloni me krijimin e një programi të fortë punësimi. Angazhimi ose mos angazhimi i punonjësve mund të fillojë para se punonjësit tuaj të rinj të marrin detyrën, madje 40% e punonjësve e lënë punën brenda gjashtë muajve të parë. Pra, është e rëndësishme që prej fillimit, t'i përfshini menjëherë dhe t'i mbani të angazhuar me programin tuaj të punësimit.

4. Forcimi i kulturës organizative

Punonjësit e angazhuar shpesh veprojnë si ambasadorë të kulturës suaj organizative. Ata i përqafojnë dhe i mishërojnë vlerat, normat dhe sjelljet thelbësore që përcaktojnë kulturën. Duke demonstruar vazhdimisht këto elemente, ata japin një shembull për bashkëpunëtorët e tyre dhe punësimet e reja, duke inkurajuar të tjerët të bëjnë të njëjtën gjë.

Për të ndërtuar një kulturë të fortë organizative, në të cilën punonjësit ndihen krenarë që janë pjesë, ka dy aspekte kyçe për t'u fokusuar:

• Nismat e diversitetit dhe përfshirjes: Nismat e diversitetit dhe përfshirjes u tregojnë punonjësve tuaj se aftësitë dhe cilësitë e tyre unike vlerësohen dhe festohen, duke nxitur një ndjenjë përkatësie dhe barazie brenda organizatës.

• Kompensimi i drejtë dhe përfitimet: Pagat konkurruese dhe paketat gjithëpërfshirëse të përfitimeve tregojnë se kompania juaj i njeh përpjekjet, përkushtimin dhe kontributet e punonjësve për punën dhe arritjet e tyre.

5. Zhvillimi i aftësive drejtuese

Një nga faktorët kryesorë të angazhimit të lartë të punonjësve është zhvillimi i karrierës. Kur punonjësit tuaj ndihen sikur kanë mundësi të rriten dhe të zgjerojnë aftësitë e tyre brenda organizatës suaj, ata janë më të prirur të ndihen të angazhuar në punën e tyre. Programet e trajnimit dhe mentorimit janë dy mënyra efektive për t'u treguar punonjësve tuaj se ju investoni në rritjen dhe zhvillimin e tyre.

Programet e trajnimit zakonisht projektohen për të trajtuar objektiva specifike të të mësuarit. Ato kanë prirjen të përqendrohen në mësimin e një aftësie të re ose një teme specifike që lidhet me punën e tyre. Këto programe shpesh mësohen nga kolegë ose trajnerë me eksperiencë dhe bazohen në programe mësimore.

Programet e mentorimit nxisin marrëdhëniet midis individëve me përvojë (mentorëve) dhe individëve që duan të rriten dhe të zhvillojnë aftësitë e tyre drejtuese. Këto marrëdhënie janë zakonisht më personale se ato në një program trajnimi. Programet e mentorimit fokusohen në zhvillimin e përgjithshëm personal dhe profesional të aftësive. Mentorët japin udhëzime, këshilla dhe mbështetje, duke i ndihmuar ata të zhvillohen në rrugën e tyre të karrierës, të vendosin synime dhe të zhvillojnë aftësi.

6. Prioritizimi i mirëqenies së punonjësve

Kur punonjësit janë të lumtur dhe të shëndetshëm, ata kanë më shumë gjasa të ndihen të angazhuar me punën e tyre dhe kompaninë tuaj. Punonjësit e angazhuar kanë tendencë të ndjejnë një kënaqësi më të thellë për rolet e tyre, gjë që shpesh ul stresin dhe ankthin që lidhet me punën. Organizatat kryesore e kanë prioritet mirëqenien fizike dhe mendore të punonjësve të tyre dhe e shprehin këtë nëpërmjet programeve të mirëqenies dhe nismave për reduktimin e stresit.

Ka disa mënyra se si mund të nxisni mirëqenien e punonjësve: 

7. Përmirësimi i bashkëpunimit

Bashkëpunimi inkurajon ndjenjën e qëllimit dhe objektivave të përbashkëta midis anëtarëve të ekipit. Kur punonjësit shohin ndikimin e drejtpërdrejtë të përpjekjeve të tyre në suksesin e ekipit, ata shpesh janë më të motivuar për të kontribuar aktivisht dhe, kështu, për t'u angazhuar më shumë.

Që anëtarët e ekipit të bashkëpunojnë në mënyrë efektive, ata duhet të ndihen mirë të ndajnë opinionet dhe idetë e tyre me njëri-tjetrin. Ushtrimet e ndërtimit të ekipeve nxisin besimin dhe miqësinë, të cilat mund të forcojnë marrëdhëniet e tyre të punës dhe të përmirësojnë përpjekjet e bashkëpunimit.

Është gjithashtu thelbësore të pajisni ekipin tuaj me mjete që i ndihmojnë ata të bashkëpunojnë në mënyrë efektive me njëri-tjetrin, duke përfshirë programet kompjuterike të menaxhimit të projektit, platformat e ndarjes së dokumentacionit dhe një aplikacion mesazhesh. Kjo është veçanërisht e nevojshme nëse jeni në një mjedis pune të largët ose hibrid, ku anëtarët e ekipit nuk janë fizikisht në të njëjtin vend.

8. Ndërtimi i një sistemi efektiv për shpërblim dhe njohje

Kur vazhdimisht i njeh dhe i shpërblen punonjësit për punën e tyre të palodhur, kjo i motivon ata që të vazhdojnë të performojnë në maksimum. Kështu, ata ndihen të vlerësuar, gjë që shpesh rrit entuziazmin për punën e tyre.

Njohja dhe shpërblimet gjithashtu u japin punonjësve një ndjenjë arritjeje. Kjo njohje i jep vlerë përpjekjeve të tyre dhe ushqen ndjenjën e përkatësisë dhe angazhimit ndaj misionit, vizionit dhe vlerave të kompanisë. Kjo lloj njohjeje mund të përmirësojë edhe kënaqësinë në punë dhe mirëqenien e përgjithshme.

9. Rritje e besnikërisë së punonjësve

Kur punonjësit ndiejnë një ndjenjë të thellë besnikërie, ka shumë të ngjarë që ata të angazhohen me gjithë zemër në misionin dhe vizionin e organizatës dhe të punojnë më me efektshmëri drejt qëllimeve të përgjithshme të kompanisë.

Punonjësit besnikë dhe të angazhuar shpesh janë më të përkushtuar ndaj organizatës suaj sesa thjesht punonjësit e angazhuar, pasi e perceptojnë punën e tyre si pjesë përbërëse të diçkaje më të madhe. Ata punojnë shumë për të mishëruar misionin e organizatës, duke derdhur energjinë, kreativitetin dhe përpjekjet e tyre për të harmonizuar veprimet e tyre me vizionin më të gjerë.

Kompanitë mund të nxisin besnikërinë duke mbështetur zhvillimin profesional, duke njohur dhe shpërblyer performancën e jashtëzakonshme dhe duke krijuar një kulturë që vlerëson dhe shpërblen kontributet e punonjësve të saj.

Mentorimi është një strategji e provuar angazhimi

Angazhimi i lartë i punonjësve është i mundur, veçanërisht kur përqendrohesh në këto nëntë nisma. Nëse nuk jeni të sigurt se nga të filloni, shqyrtoni një program mentorimi. Lidhja e punonjësve tuaj me mentorët është një strategji e provuar që rrit angazhimin e tyre dhe ndërton lidhje sociale.

Programet e mentorimit ndihmojnë në nxitjen e mentalitetit të rritjes dhe përshpejtimin e zhvillimit të punonjësve. Ato mund ta transformojnë organizatën tuaj në një qendër të rritjes profesionale, bashkëpunimit dhe mirëqenies së punonjësve, duke nxitur suksesin afatgjatë.