Vitet e fundit, Inteligjenca Emocionale vazhdon të tërheqë gjithnjë e më shumë vëmendjen, jo vetëm për tema të jetës së përditshme por veçanërisht për organizatat e biznesit. Tashmë është vërtetuar efekti i saj në suksesin e biznesit, dhe si rrjedhojë, njerëzit me inteligjencë të lartë emocionale janë më të dëshirueshëm e më të kërkuar nga punëdhënësit. Gjithashtu, bizneset e kujdesshme kanë shfaqur një vëmendje të shtuar edhe në ndërgjegjësimin dhe ngritjen e nivelit të Inteligjencës Emocionale edhe për personelin ekzistues, sidomos për nivelet e ndryshme drejtuese brenda organizatave. Një shpjegim të shpejtë se si Inteligjenca Emocionale ju bën një menaxher më të mirë e gjeni në shkrimin këtu. Lexim të këndshëm!    

* * * * *

Menaxherët duhet të udhëheqin organizatat për të arritur rezultatet e biznesit. Ata duhet të kenë aftësinë për t'i motivuar njerëzit që të ndjekin një vizion dhe të punojnë pa pushim drejt një qëllimi të përbashkët.

Prandaj, menaxherët duhet të kenë aftësitë e forta si dhe aftësinë për të kuptuar nevojat emocionale të anëtarëve të ekipit dhe të palëve të tjera, duke përfshirë klientët dhe partnerët. Për shkak të këtij aspekti njerëzor të menaxhimit në një biznes, Inteligjenca Emocionale është për menaxherët një aftësi vendimtare, që secili duhet ta përmirësojë vazhdimisht dhe me vetëdije.

Çfarë është Inteligjenca Emocionale në udhëheqje?

Inteligjenca Emocionale në udhëheqje është aftësia jonë për të qenë të vetëdijshëm për emocionet tona ndërkohë që drejtojmë një ekip që punon drejt një qëllimi të përbashkët. Ai përfshin aftësinë për të vlerësuar ndjenjat e të tjerëve në një situatë. 

Ai gjithashtu i referohet aftësisë për të kanalizuar energjinë emocionale të të tjerëve drejt suksesit. Më e rëndësishmja, ai përfshin gjithashtu aftësinë për të kuptuar ndikimin e veprimeve të dikujt në emocionet e palëve të tjera të interesuara në çdo situatë biznesi.

Mënyrat në të cilat ju ndihmon Inteligjenca Emocionale

Këtu janë shtatë mënyra se si Inteligjenca Emocionale ju bën një menaxher më të mirë:

1. Inteligjenca Emocionale ju bën më të vetëdijshëm

Vetëdija dhe menaxhimi i vetvetes është hapi i parë i trajtimit të një situate ose një ekipi. 

Nëse jeni të vetëdijshëm për gjendjen tuaj emocionale, veçanërisht në një situatë stresuese, mund të merrni vendime më të mira pa u ndikuar nga gjendja juaj emocionale. Ky aspekt vlen edhe për të dyja rastet, si kur jeni në nivele të larta ose të ulëta emocionale; në të dyja gjendjet, emocionet tuaja mund t'ju shtyjnë drejt marrjes së vendimeve të paarsyeshme.

2. Ju merrni vendime më të mira biznesi

Me inteligjencë më të lartë emocionale, ju merrni vendime bazuar në fakte dhe shifra, duke sjellë rezultate më të mira. 

Si menaxherë, ne shpesh jemi të lidhur me disa bindje ose disa projekte. Rrjedhimisht, e kemi të vështirë të heqim dorë nga disa prej tyre, veçanërisht kur nuk funksionojnë siç pritej. Të kemi kontroll mbi veprimet tona, duke shmangur paragjykimet emocionale në procesin e vendimmarrjes, na ndihmon të marrim vendime objektive e të zgjuara.

3. Ju mund të motivoni anëtarët e ekipit tuaj

Emocionet janë ngjitëse në një ekip. Nëse menaxheri rrezaton emocione pozitive, ekipi ndihet më i motivuar dhe më i sigurt. Energjia pozitive që rezulton mund ta shtyjë ekipin drejt suksesit.

4. Ju përcillni ndjeshmëri tek anëtarët e ekipit që kanë nevojë për mbështetje. 

Një menaxher i ndjeshëm mund të kuptojë sfidat reale për një anëtar të ekipit dhe të sigurojë mbështetjen e nevojshme. Rrjedhimisht, ju mund të ktheni moralin dhe motivimin tek punonjësit që hasin vështirësi.

5. Anëtarët e ekipit ndihen më të sigurt me një menaxher me Inteligjencë Emocionale më të lartë

Ata e kuptojnë se menaxheri do t'i trajtojë ata me drejtësi edhe kur situata mund të jetë e vështirë dhe e rrezikshme. Ky besim ndërton besnikërinë ndaj ekipit dhe secili anëtar angazhohet me përkushtim dhe pa frikë drejt suksesit.

6. Një menaxher me Inteligjencë Emocionale të lartë do të përgatisë menaxherët e ardhshëm

Një test i udhëheqjes së vërtetë është se si një menaxher mund të ndërtojë më shumë liderë nga ekipi i tij. Anëtarët e ekipit thithin aftësitë e buta që shfaq menaxheri. Dhe në fund, ata përgatiten në menaxherë me inteligjencë më të lartë emocionale.

7. Inteligjenca Emocionale i sjell përfitime karrierës tuaj

Në nivel individual, studimet tregojnë se njerëzit me inteligjencë më të lartë emocionale mund të rriten më shpejt në organizatë. Ata fitojnë më shumë para dhe gjithashtu fitojnë dhe respektin e bashkëpunëtorëve, anëtarëve të ekipit dhe klientëve.

Si të përmirësohet Inteligjenca Emocionale në udhëheqje?

Hapi i parë, është të vendosni me vetëdije që do të përmirësoni inteligjencën emocionale. Më pas, duhet të reflektoni mbi situatat e kaluara ku ju mund të kishit reaguar/vepruar më mirë nëse do të kishit inteligjencë më të mirë emocionale. 

Për më tepër, ju si menaxherë duhet të shmangni nxitimin sa herë që ju duhet të komunikoni me të tjerët ose të merrni vendime. Sidomos në situata stresuese, kur do ndjeni nevojën e do ju duhet të veproni shumë shpejt. Një kontroll i shpejtë mendor për të rishikuar mendimet dhe për të kontrolluar emocionet para se të veproni ose të komunikoni, mund të bëjë mrekulli. 

Për më tepër, ju duhet t'i kushtoni vëmendje emocioneve të anëtarëve të ekipit. Ju duhet të kuptoni se çfarë komunikon personi përmes gjuhës së trupit gjatë takimeve. Më e rëndësishmja, si menaxherë ju duhet të vendosin veten në vendin e tyre, kur keni të bëni me anëtarët e ekipit, veçanërisht në situata të pakëndshme.

Si përfundim

Menaxherët, të cilët me vetëdije përpiqen të zhvillojnë inteligjencën e tyre emocionale, së shpejti do të dëshmojnë përfitimet e aplikimit të saj në udhëheqje. Ata mund të presin rezultate pozitive, si përmirësimi i produktivitetit të ekipit, konsumim më i ulët, inovacione për produktet dhe klientë më të lumtur.

Më tej, biznesi do të përfitojë kur ekipet punojnë drejt një qëllimi të përbashkët e të fokusuar. Arsyeja është se ekipi përqendron të gjitha energjitë e tij në rezultatet e biznesit. Një skenar i tillë mund të jetë i mundur vetëm kur një menaxher e drejton biznesin me inteligjencë të lartë emocionale.