Ka shumë aftësi mbi të cilat mund të punoni për t’i përsosur gjatë gjithë karrierës suaj. Një prej tyre dhe shumë e rëndësishme është edhe aftësia e negocimit, si pjesë përbërëse e aftësive të komunikimit. Të gjithë negociojmë çdo ditë dhe kudo, sapo të jemi në marrëdhënie me të tjerët. Ndërsa negociatat me miqtë dhe të afërmit janë disi të lehta e pothuajse nuk bien në sy, negociatat e biznesit janë më të vështira e më stresuese, si në ndërveprimet jozyrtare të përditshme ashtu edhe në transaksionet formale, si mund të jenë kushtet e shitjes, qiraja, ofrimi i shërbimeve dhe mbyllja e kontratave ligjore. Në negocim kërkohet të jepni e të merrni, e ndonjëherë ju kërkohet të jepni edhe nga vetja juaj. Ndërsa ka gjëra që mund të negociohen, ashtu ka edhe gjëra që nuk mund të diskutohen asnjëherë për negocim, 10 prej të cilave Anthony Iannarino jua ndalon rreptësisht t’i negocioni. Lexoni shkrimin këtu dhe jepni mendimin tuaj nëse ai ka të drejtë. Lexim të këndshëm!

* * * * *

Do t'ju kërkohet të negocioni gjëra, ndërmjet të cilave edhe disa, të cilat kurrë nuk duhet t’i vendosni në tryezën e negocimit. Çfarëdo që ju ofrohet në biznes asnjëherë ajo nuk do të barazohet me atë që ju kërkohet të hiqni dorë. 

Lista e mëposhtme përfshin 10 gjërat e ndaluara për t’u negociuar.

1. Integriteti ose Karakteri: Nëse ka një gjë që kurrën e kurrës nuk duhet ta negocioni, është integriteti juaj. Karakteri juaj vlen për ju më shumë se gjithçka që posedoni. Herë pas here, do të viheni në provë. Dikush do t'ju kërkojë të bëni diçka të paligjshme ose të pamoralshme, dhe ata që ju kontrollojnë do të negociojnë duke ju premtuar përfitim, me siguri përfitim material. Pavarësisht se kush ofron, dhe pavarësisht se çfarë ju ofrojnë, pasi ta negocioni integritetin tuaj, është e vështirë ta rikuperoni - dhe në disa raste, është krejt e pamundur. Ruani “armët” tuaja.
2. Qëllimet dhe ëndrrat tuaja: Është shumë e thjeshtë për t’i tregtuar qëllimet dhe ëndrrat tuaja, me ato që sugjerojnë njerëzit e tjerë dhe shoqëria. Tendenca e "ndërrimit të kursit" është e fuqishme, dhe do t'ju tërheqë në një drejtim, jo në atë të zgjedhjes suaj. Kjo tendencë ju bën të ndiheni mirë. Është komode sepse përshtateni dhe nuk i bëni të tjerët të ndihen të pakënaqur apo të pakëndshëm. Askush nuk mund ta jetojë jetën tuaj për ju. Asnjë grup njerëzish, të lidhur lirshëm së bashku, nuk ka të drejtë të vendosë se çfarë është e duhura për ju. Ju nuk mund të negocioni qëllimet, objektivat dhe ëndrrat tuaja, pavarësisht se kush përpiqet t'i negociojë ato. Është jeta juaj, dhe këto janë ëndrrat tuaja. Askush nuk duhet ta pëlqejë atë, por ata duhet të jetojnë me vendimin tuaj.
3. Prioritetet tuaja: Qëllimet dhe ëndrrat janë një gjë dhe prioritetet janë diçka tjetër. Ju nuk keni pse të negocioni me të tjerët atë që tani, është më e rëndësishme për ju. Ajo që njerëzit e tjerë duan nga ju merr përparësi mbi atë që dëshironi nga vetja. Asnjëherë nuk duhet të jeni të vrazhdë për t'u thënë jo gjërave të vogla, në mënyrë që të mund t'u thoni po gjërave që për ju gjithsesi janë më të rëndësishmet. Është gjithashtu e vërtetë, që ju nuk keni nevojë të negocioni për prioritetet tuaja - më së paku me dikë që nuk do të shfaqet në funeralin tuaj.
4. Fjala juaj: Nëse thoni se do të bëni diçka, bëjeni atë që keni thënë se do ta bëni. Fjala juaj është detyrimi juaj. Është një premtim, edhe nëse nuk e kuptoni se keni bërë një premtim kur keni thënë fjalët. Personi që dëgjon fjalët e tua, beson se ju e kishit menduar mirë atë që thatë. Ai që do t’ju kërkonte të negocioni fjalën tuaj të dhënë është një batakçi. Justifikimet e dhëna, pasi të keni thënë se çfarë do të bënit, nuk kanë asnjë peshë dhe bëhen të pakuptimta, për ata me të cilët flisni.
5. Besnikëria juaj: Besnikëria juaj nuk mund të shitet. Nëse i detyroheni dikujt besnikërinë tuaj, si integritetin dhe fjalën tuaj, ju nuk e negocioni asnjëherë. Mund të keni pasur ose të keni ndonjë moment kur dikush është përpjekur ose përpiqet t'ju premtojë diçka, për të zhvendosur angazhimin tuaj ndaj tij, madje duke ju dhënë një arsyetim për ta bërë këtë. Por, nëse negocioni besnikërinë tuaj, ju jeni tradhtar dhe jobesnik. Nëse nuk jeni besnik, nuk do të gjeni besnikëri. Kipling ka shkruar: "Forca e tufës është ujku dhe forca e ujkut është tufa".
6. Besimi në veten tuaj: Njerëzit lindin me një vetëdije për të shoqëruar ndërgjegjen e tyre. Disa do të përpiqen t'ju bindin se nuk jeni ashtu si mendoni, se duhet të dyshoni në veten tuaj. Disa do ta bëjnë këtë nga dashuria e tyre për ju, si një mënyrë për t'ju parandaluar që të lëndoheni. Të tjerët do të përpiqen t'ju bëjnë të shihni diçka ndryshe nga ajo që shikoni në pasqyrë, si një mënyrë për të mos u ndjerë aq i vogël. Cilido qoftë motivimi, besimi juaj në veten tuaj nuk mund të këmbehet me frikën e njerëzve të tjerë, pavarësisht nga motivimi i tyre.
7. Qëndrimi juaj: Qëndrimi juaj është një zgjedhje. Të shumtë do të jenë ata që do të përpiqen t'ju bindin ta shihni gotën gjysëm bosh, disa do ju sugjerojnë se ajo që përmban gota është helm. Ka industri të tëra të ndërtuara për t'ju bindur të jeni pesimistë, cinikë dhe të frikësuar. Është një akt plot kurajo dhe guxim të vendosni të jeni pozitiv, optimist dhe i fuqizuar. Ju duhet të injoroni përpjekjet për të negociuar qëndrimin tuaj. Gota gjysmë plot nuk është plot me helm, por fjalët e atyre që do të donin të besoni se kjo ishte e vërtetë, nuk janë asgjë më pak se një helm vdekjeprurës.
8. Supozimi i qëllimeve të mira: Çdo ditë, do të keni të paktën një mundësi të supozoni se njerëzit që janë të ndryshëm nga ju janë armiqtë tuaj. Ju do të keni arsye për të besuar, se njerëzit që besojnë diçka ndryshe nga ju, janë disi të këqij, të denjë për zemërimin ose urrejtjen tuaj. Pra, ju mund të supozoni se qëllimet e tyre janë të këqija. Por ju nuk keni pse ta shkëmbeni gatishmërinë tuaj për t’i supozuar qëllimet e tyre të mira, e duke e bërë këtë, i lejoni njerëzit që të supozojnë qëllimet tuaja të mira.
9. Individualiteti juaj: Ju keni lindur si një individ. Ndërsa ju mund t'i përkisni shumë grupimeve, nuk ka asnjë grup që ia vlen t'i bashkoheni, e që do t'ju bënte të hiqnit dorë nga ajo se cili jeni. Do të hasni njerëz që do duan që ju të ndryshoni, ose më saktë, që do duan t'ju ndryshojnë. Por ju kurrë nuk duhet të negocioni atë se kush dhe çfarë jeni, për të kënaqur dikë tjetër.
10. Fuqia juaj personale: Ju keni fuqinë të jeni më lart, të bëni më shumë, të keni më shumë dhe të kontribuoni më shumë. Ju keni lirinë e zgjedhjes, aftësinë për të vendosur dhe për të vepruar, sipas asaj që dëshironi. Ju kurrë nuk duhet të bëni kompromis ose të lejoni dikë ose diçka, që t’ju mohojë fuqinë që keni marrë falas dhe qartë, prej lindjes tuaj. Jeta juaj ju përket juve dhe është e drejta juaj ta jetoni.

Mbajini të shenjta këto gjëra, që kanë kaq shumë rëndësi.