Nëse keni aplikuar ndonjëherë për punë diku, në një organizatë disi të madhe, patjetër keni komunikuar fillimisht me punonjës të departamentit të Burimeve Njerëzore. Ata kanë përgatitur dhe publikuar njoftimin që ju keni lexuar e më pas keni aplikuar, ata ju kanë njoftuar për të marrë kontaktet e para, intervistat, etj. dhe ju kanë dhënë informacionet e ju kanë udhëzuar lidhur me fillimin e punës. Nëse ka qenë një departament i mirorganizuar atëherë ju keni pasur ose do të keni kontakte më të shpeshta për çdo gjë që lidhet me kushtet tuaja të punës, kompensimin, pagën, etj. Megjithatë, në jo pak raste gjatë punës tonë si konsulentë biznesi, ne hasim shumë paqartësi në ekipet e punonjësve rreth pozicionit dhe funksioneve të departamentit të Burimeve Njerëzore. Duke u kthyer tek bazat, në shkrimin këtu, me autore Ruth Mayhew, ju mund të mësoni disa prej koncepteve dhe funksioneve të lidhura me Burimet Njerëzore, që mund t’ju orientojnë më mirë në punën tuaj. Fuqia njerëzore, si aseti më i vyer i çdo organizate ka nevojë për menaxhim, trajnim dhe trajtim për të funksionuar në mënyrë efektive. Urojmë që organizata juaj dhe ju ta bëni shumë mirë këtë. Lexim të këndshëm!   

* * * * *

Një departament i Burimeve Njerëzore, i drejtuar në mënyrë efikase mund t'i sigurojë organizatës suaj strukturën dhe aftësitë për të përmbushur nevojat e biznesit, përmes menaxhimit të asetit më të rëndësishëm të kompanisë suaj - punonjësve të saj. Ka disa drejtime të punës së Burimeve Njerëzore, por specialistët e Burimeve Njerëzore në secilin drejtim mund të kryejnë më shumë se një prej gjashtë funksionet thelbësore. Në bizneset e vogla pa një departament të dedikuar të Burimeve Njerëzore, është e mundur të arrihet i njëjti nivel i efikasitetit dhe menaxhimit të fuqisë punëtore përmes kontraktimit të funksioneve të Burimeve Njerëzore ose bashkimit me një organizatë profesionale punëdhënëse.

Gjashtë funksionet kryesore të BNj janë Rekrutimi, Siguria në vendin e punës, Marrëdhëniet me punonjësit, Planifikimi i kompensimit, Pajtueshmëria me ligjin e punës dhe Trajnimi.

Rekrutimi i njerëzve të duhur për punën e duhur

Suksesi i rekrutuesve dhe specialistëve të punësimit në përgjithësi matet nga numri i pozicioneve që ata plotësojnë dhe koha që duhet për të plotësuar ato pozicione. Rekrutuesit që punojnë brenda kompanisë – ashtu si edhe kompanitë që ofrojnë shërbime të rekrutimit dhe personelit – luajnë një rol kyç në zhvillimin e fuqisë punëtore të punëdhënësit. Ata reklamojnë postimet e punës, thithin kandidatët, i kontrollojnë dhe ekzaminojnë aplikantët, kryejnë intervistat paraprake dhe koordinojnë veprimet e punësimit me menaxherët përgjegjës, për të bërë përzgjedhjen përfundimtare të kandidatëve.

Ruajtja e një mjedisi të sigurt pune

Siguria në vendin e punës është një faktor i rëndësishëm. Sipas ligjeve në fuqi dhe kryesisht Kodit të Punës, punëdhënësit kanë detyrimin të ofrojnë një mjedis të sigurt pune për punonjësit. Një nga funksionet kryesore të BNj është të sigurojë trajnimin e punonjësve për sigurinë në vendin e punës dhe të mbajë regjistrat e nevojshëm për trajnimet si dhe për raportimin e lëndimeve në vendin e punës. Përveç kësaj, specialistët e sigurisë dhe rriskut të Burimeve Njerëzore shpesh punojnë ngushtë me specialistët e tjerë të Burimeve Njerëzore për të menaxhuar çështjet e kompensimit të punonjësve të kompanisë.

Marrëdhëniet punëdhënës-punonjës

Në një mjedis pune të sindikalizuar, çështjet e punonjësve dhe të marrëdhënieve të punës të BNj mund të kombinohen dhe trajtohen nga një specialist i BNj, ndërsa në kompanitë e mëdha mund të jenë funksione krejtësisht të veçanta të menaxhuara nga dy specialistë të BNj me ekspertizë specifike në secilën fushë. Marrëdhëniet e punonjësve janë disiplinë e Burimeve Njerëzore që ka të bëjë me forcimin e marrëdhënieve punëdhënës-punëmarrës, përmes matjes së kënaqësisë në punë, angazhimit të punonjësve dhe zgjidhjes së konfliktit në vendin e punës. Funksionet e marrëdhënieve të punës mund të përfshijnë zhvillimin e përgjigjes së menaxhmentit ndaj fushatave të sindikatave, negocimin e marrëveshjeve kolektive dhe interpretimin e çështjeve të kontratave të punës.

Kompensimi dhe Përfitimet

Ashtu si punonjësit dhe marrëdhëniet e punës, funksionet e kompensimit dhe përfitimeve të BNj shpesh mund të trajtohen nga një specialist i BNj me ekspertizë të dyfishtë. Nga ana e kompensimit, funksionet e Burimeve Njerëzore përfshijnë vendosjen e strukturave të kompensimit dhe vlerësimin e praktikave konkurruese të pagave. Specialisti i kompensimeve dhe përfitimeve gjithashtu mund të negociojë edhe elementë të kompensimit si tarifat e mbulimit shëndetësor, siguracione etj. Përllogaritja e pagave mund të jetë një komponent i seksionit të kompensimit dhe përfitimeve të BNj. Megjithatë, në shumë raste, punëdhënësit mund të kontraktojnë funksione administrative që lidhen me kompensimin dhe përfitimet.

Pajtueshmëria e Ligjit të Punës

Pajtueshmëria me ligjet e punës dhe të punësimit është një funksion shumë i rëndësishëm i BNj. Mospërputhja mund të rezultojë në ankesa prej punonjësve, që mund të lidhen me praktikat e padrejta të punësimit, kushte të pasigurta të punës dhe pakënaqësi të përgjithshme me kushtet e punës, që mund të ndikojnë në produktivitetin dhe në fund të fundit, përfitimin e kompanisë. Stafi i Burimeve Njerëzore duhet të jetë i vetëdijshëm për ligjet dhe udhëzimet e lidhura me punësimin, të tilla si Kodi i Punës dhe shumë rregullave dhe rregulloreve të tjera.

Trajnimi dhe Zhvillimi

Punëdhënësit duhet t'u ofrojnë punonjësve mjetet e nevojshme për suksesin e tyre, gjë që, në shumë raste, nënkupton trajnimet e hyrjes për punonjësit e rinj, të cilat i ndihmojnë dhe i orientojnë ata të kuptojnë dhe kalojnë në një kulturë të re organizative. Shumë departamente të Burimeve Njerëzore hulumtojnë nevojat për trajnim të stafeve dhe ofrojnë programe trajnime për lidership dhe zhvillim personal e profesional. Trajnimi i lidershipit mund të jetë i nevojshëm për mbikëqyrësit dhe menaxherët e sapo punësuar dhe të promovuar, për tema të tilla si komunikimi, menaxhimi i ekipeve, menaxhimi i performancës dhe si të trajtohen çështjet e marrëdhënieve me punonjësit në nivel departamenti.

Mundësitë e zhvillimit profesional janë për të gjithë punonjësit e veçanërisht për ata që duan të arrijnë objektivat personalë apo që kërkojnë mundësi promovimi. Programe të tilla si asistenca e shkollimit dhe programet e rimbursimit të shkollimit shpesh janë brenda fushës së trajnimit dhe zhvillimit të Burimeve Njerëzore.