Në biznes, si në jetë, nuk ka garanci që gjërat do të ecin ashtu si janë parashikuar. Ne hasim vazhdimisht sfida të reja, ku qëndrimi dhe sjellja jonë ndaj tyre përcakton zotësinë tonë për t’i përballuar ato. Natyrisht që sfidat sjellin pasiguri, por pasiguria nuk duhet të jetë burim frike e zhgënjimi, aq më shumë për punonjësit tuaj. Në shkrimin më poshtë, autori Martin Zuilling na sjell disa ide, bazuar në eksperiencën dhe studimet e tij, mbi mënyrat se si të përballoni dhe të veproni për të shmangur ankthin dhe për të ruajtur nivelin e motivimit të punonjësve, edhe në momentet e sfidave dhe paqartësive në rrugën tuaj drejt suksesit. Sfidat dhe pasiguria janë një burim potencial avantazhi, pasi nëse të gjithë do të ishin të aftë të parashikonin çdo rezultat të mundshëm, atëherë përparësia konkurruese do të pushonte së ekzistuari. Ju nuk mund të kontrolloni pasiguritë e biznesit, por mund të zbusni ndikimin e tyre, në ekipin tuaj. Lexim të këndshëm!

* * * * *

Gjatë viteve të mia si këshilltar i bizneseve të reja dhe fillestarëve, kam mësuar se e vetmja siguri që mund t'u ofroj sipërmarrësve është fakti se ata do të përballen me shumë pasiguri.

Kështu që këshilla ime e parë është që nëse nuk përballeni dot me pasiguritë, as mos i hyni asaj rruge. Nga ana tjetër, të qënit sipërmarrës shoqërohet me idenë e përgjithshme se kjo është një nga rrugët më të lumtura dhe më të shëndetshme të karrierës.

Anëtarët e ekipit tuaj, pavarësisht se ju mund të mendoni se është normale, shpesh vuajnë më shumë sesa ju si sipërmarrës, nga pasiguria në vendin e punës. Sidoqoftë, unë jam i bindur që me veprimet tuaja, ju keni mundësinë që të lehtësoni shumë nga këto ankthe, kështu që unë isha i kënaqur të shihja ide të ngjashme në librin e ri “Ankthi në Punë”.

Autorët Adrian Gostick dhe Chestor Elton, me eksperiencën e tyre të gjerë si trajnerë dhe këshilltarë organizativë, rekomandojnë disa mënyra të thjeshta, në këndvështrimin tim, për të zbutur pasigurinë dhe për të rritur produktivitetin, në ekipet dhe punonjësit tuaj.

1. Është normale që punonjësit të mos i kenë të gjitha përgjigjet.

Si udhëheqës ose menaxher, është e rëndësishme që të pranoni që, si ju dhe as askush tjetër, nuk mund t’i keni të gjitha përgjigjet. Ju duhet të përcaktoni qartë çështjet ku dihen përgjigjet - siç janë problemet e procesit, krahasuar me sfidat e tregut - ku forcat janë të paparashikueshme.

Një nga mënyrat që ju sugjeroj është, të inkurajoni debate të strukturuara për çështjet, duke pranuar së pari, se idetë tuaja mund të jenë të gabuara, dhe duke inkurajuar kontributin e tyre edhe nëse nuk kanë përgjigje, e pa ndëshkime - nëse sugjerimet e tyre nuk funksionojnë. Kjo krijon një mjedis ku ankthi mënjanohet ose minimalizohet.

2. Lehtësoni kontrollin tuaj gjatë situatave të paqarta.

Shumë prej nesh kanë tendencën për të mikromenaxhuar dhe për tu bërë më kontrollues gjatë sfidave dukshëm të pasigurta. Kjo zakonisht shkakton më shumë ankth dhe stres për të gjithë, dhe zvogëlon të menduarit jashtë kutisë, ul përpjekjet krijuese dhe ndërmarrjen e rrezikut të nevojshëm për të arritur në zgjidhjen më të mirë. Së pari, Dëgjoni.

Gjithashtu, nuk është e rekomandueshme që të qëndroni pozitivë gjatë situatave stresuese dhe të pasigurta. Pozitiviteti juaj do të mbajë të ulët nivelin e stresit, e po kështu edhe nivelin e produktivitetit për të gjithë anëtarët e ekipit, duke përfshirë edhe veten tuaj. Ju do të jeni modeli dhe njerëzit do të ndjekin shembullin tuaj.

3. Sigurohuni që të gjithë e dinë se çfarë pritet prej tyre.

Ankthi do të rritet nëse anëtarët e ekipit shohin vazhdimisht ndryshime, objektiva të paqarta, ose mungesë udhëzimesh se si të arrihen objektivat e tyre. Në situata dhe periudha të pasigurta, afatet kohore të matjes së arritjeve duhet të jenë më të shkurtra. Përshkrimi i mirë i punës është një fillim i mirë, por shkëmbimi i rregullt i informacionit dhe dëgjimi aktiv janë të domosdoshëm.

Si rregull i përgjithshëm, nëse një punonjës bën pyetje në lidhje me imtësitë, është e drejtë të supozohet se kjo është një tregues që ata nuk janë të njohur me procesin - dhe që kanë nevojë për më shumë udhëzime ose trajnime. Kurrë mos supozoni se ajo që është normale dhe e qartë për ju, është po aq e qartë për të gjithë anëtarët e ekipit.

4. Mbajini njerëzit të përqendruar në atë që mund të kontrollohet.

Kur anëtarët e ekipit përqendrojnë mendimet e tyre në gjëra që nuk mund t’i kontrollojnë, siç është rënia ekonomike, ankthi rritet. Mos përdorni objektiva të paarritshëm për të shtrydhur ekipet në kufijtë e tyre. Ndihmoni anëtarët e ekipit të kuptojnë se çfarë nuk mund të ndryshojnë dhe rishikoni listën e tyre të detyrave, për kontribute të tjera të vlefshme.

Ndihmoni ekipin tuaj të pranojë se, nganjëherë, gjithçka që ata mund të kontrollojnë në të vërtetë, është përpjekja dhe qëndrimi i tyre. Kur e dedikoni energjinë tuaj në gjërat që mund t’i kontrolloni, do të jeni shumë më pak të stresuar dhe shumë më produktivë, qoftë si menaxher ose si punonjës.

5. Shfaquni si njeri i veprimit dhe se e pranoni rrezikun.

Është gjithmonë e nevojshme për të marrë vendime dhe për të ecur përpara, edhe në situata pasigurie. Të ngelesh peng i analizës dhe perfeksionizmit nuk është një gjë e mirë, sidomos në mjediset e sotme që ndryshojnë me shpejtësi. Shikojeni çdo lëvizje përpara si një moment mësimi, pavarësisht nga rezultati. Tregoni përulësi dhe pranoni gabimet tuaja.

6. Mos kini frikë të jepni udhëzime të drejta dhe të vështira.

Reagimi më i mirë konstruktiv përfshin ide specifike për përmirësim, në vend të diskutimeve të përgjithshme, së bashku me lavdërimet e merituara, në masën e duhur. Reagimi konstruktiv minimizon pasigurinë duke qartësuar pritshmërinë dhe ndërton besimin se dikush mund të përmirësohet dhe se i njihen përpjekjet.

Në përgjithësi, është e rëndësishme të mbani parasysh se pasiguritë e biznesit sjellin mundësi që ju të fitoni mbi konkurrencën dhe të keni sukses në planin afatgjatë. Sfida juaj është që t’i zgjidhni këto sfida më shpejt dhe në mënyrë më efektive, për klientët tuaj.

Për ta bërë këtë, ju duhet një ekip i përkushtuar dhe i motivuar prej sfidave. Bëjeni atë një situatë fituese për punonjësit dhe për biznesin tuaj.