Të dini se kush janë konkurrentët tuaj dhe çfarë ofrojnë ata, mund t'ju ndihmojë që të përsosni biznesin tuaj që t'i përgjigjet sfidave. Shpesh rrugët tuaja dhe të konkurrencës kryqëzohen. Fakti është se kompanitë sot janë paranojake rreth konkurrencës, por nganjëherë do të duhet të bashkëpunoni, dhe kjo mund të sjellë të ardhura dhe mbijetesë. Mbani gjithmonë një dritare hapur, duke ruajtur etikën dhe respektuar konkurrencën. Merrni disa ide nga Jeffrey Gitomer në shkrimin më poshtë, i cili është shkëputur nga libri i tij “Bibla e shitjeve”, i ribotuar. Lexim të këndshëm!

* * * * *

Një pyetje: Si ndiheni për konkurrencën tuaj? Ju përgjigjeni, "Unë kam marrëdhënie të shkëlqyera me konkurrencën time".

Kështu, apo jo. Nëse do kishit nevojë për 50,000 dollarë, përndryshe biznesi juaj do të falimentonte, unë ju garantoj se shoku juaj (konkurrenca pra,) do t'ju dërgonte një letër lamtumire.

LE TË KTHEHEMI NË REALITET: Konkurrentët mund të flasin me ju, ata mund të sillen në mënyrë qytetare me ju, dhe ata madje, mund të duket sikur ju ndihmojnë - por pyetini ata nëse do të dëshironin që të jeni të gjallë ose të vdekur, dhe unë ve bast për shtëpinë e varrimit.

“Ata më ndihmojnë mua”, ose “Ata më dërgojnë biznes”, ose “Më thërrasin për të diskutuar problemet e zakonshme”, dhe, “Ka biznes mjaftueshëm për të gjithë” - të gjitha këto janë deklarata që konkurrentët tuaj shpresojnë se do t’i thoni, ndërkohë që ata, në mënyrë sistematike planifikojnë t'ju shkatërrojnë. Kjo është jeta në xhunglën e biznesit (dhe veçanërisht në shitje).

Dikush mund të thotë: Ka një konkurrencë të mirë - Konkurrenca miqësore. "Tani le të luajmë pastër. Unë e mora shitjen e fundit, kështu që këtë mund ta merrni ju”. Por unë nuk mendoj kështu. Konkurrenca miqësore është njëlloj si gjarpërinjtë miqësorë. Ata do t'ju kthehen dhe do t'ju kafshojnë në një fraksion sekonde, dhe është disi e ndërlikuar t’i kuptoni kush janë ata helmues nga ata të sigurtit.

Konkurrenca është më shumë si një gjarpër i panjohur. Potencialisht helmues, jo nga ata me të cilin do dëshironit të afroheshit më së shumti, nga ata që është më mirë të dini gjithçka mundeni rreth tyre, dhe, t’i respektoni, por gjithmonë mbani me vete një çantë me medikamente kundër kafshimit të gjarprit – për çdo rast.

Fakte në lidhje me konkurrencën dhe ndjenjat e tyre, për ju:

• Disa janë në rregull me ju.
• Disa do të bashkëpunojnë me ju.
• Disa janë etikë me ju.
• Disa e pëlqejnë konkurrencën me ju.
• Disa do t'ju pëlqejnë juve.
• Disa do të ndajnë biznesin me ju.
• Disa do t'ju ndihmojnë juve.
• Shumica nuk do të bëjë asnjë prej këtyre më sipër. Shumica nuk ju pëlqen juve.

Ja se si të silleni me konkurrencën:

• Njihni pozicionin e tyre në treg.
• Njihni kush janë klientët e tyre kryesorë.
• Kuptoni, a po marrin ata biznes nga ju, apo ju po merrni biznes prej tyre?
• A e kanë bërë për vete ndonjë prej punonjësve tuaj?
• Merrni çdo pjesë të informacionit të tyre (literaturë shitje, broshura).
• Merrni çmimet e tyre.
• Blini tek ata çdo tremujor. Kuptoni se si shesin dhe çfarë reklamojnë.
• Identifikoni se ku ata janë më të dobët se ju dhe luani me këtë.
• Mësoni se ku ata janë më të fortë se ju dhe përmirësojeni atë... MENJËHERË.

Kur përfshiheni kundër konkurrencës në një telefonatë shitje:

• Kurrë mos thoni asgjë të keqe rreth tyre, edhe nëse klienti juaj po e bën.
• I falenderoni ata, si konkurrentë të denjë.
• Tregoni respekt ndaj tyre.
• Tregoni se ku ndryshoni ju ngaj tyre – se si përfitimet tuaja janë më të mira.
• Theksoni pikat tuaja të forta, jo dobësitë e tyre.
• Tregoni dëshmi nga një klient i juaji, i cili kaloi nga konkurrenca tek ju.
• Ruani etikën dhe profesionalizmin tuaj në çdo moment - edhe nëse kjo do të thotë të kafshoni gjuhën tuaj, derisa të rrjedhë gjak.

“Konkurrencë nuk do të thotë luftë. Do të thotë të mësoni. Do të thotë të përgatiteni. Do të thotë të jeni MË I MIRI”.