Ja ku kaloi dhe java, dhe sot po ju sjellim pjesën e dytë të artikullit mbi temën “Si të ndikoni tek njerëzit”. Nuk ka rëndësi nëse menaxhoni punonjës apo ju shisni klientëve, ose thjesht dëshironi të ndikoni mbi fëmijët tuaj për të bërë detyrat e shtëpisë, mundësia për t'i bërë njerëzit të ndryshojnë mendje është një aftësi e vlefshme. Dhënia e shembullit dhe krijimi i një reputacioni të përshtatshëm është një nga format më të rëndësishme të ndikimit. Nëse doni të krijoni dhe përsosni reputacionin tuaj të mirë, këtu janë disa sugjerime. Lexim të këndshëm dhe ju lutemi, prisni deri javën tjetër për të lexuar pjesën e fundit të temës, e më pas për të filluar librin "Si të bësh miq dhe të ndikosh njerëzit".  

* * * * *

Aftësia për të ndikuar tek njerëzit është një aftësi thelbësore dhe shumë e rëndësishme në botën reale. Ajo bën të mundur që ju të ndihmoni njerëzit që të bëhen më të mirë, ose t'i inkurajoni ata që t’i shohin gjërat nga këndvështrimi juaj. Në këtë pjesë të dytë do të trajtojmë ndikimin nëpërmjet krijimit të një reputacioni të mirë.

Krijimi i një reputacioni të mirë

1.   Pranoni gabimet tuaja, në radhë të parë. Nëse e keni gabim, sigurohuni që ta pranoni gabimin shpejt dhe me vendosmëri. Mënyra e shpejtë për të gjeneruar armiqësi është dështimi për të pranuar gabimet, kur jeni padyshim në faj. Pra, nëse doni të ndërtoni besueshmëri dhe respekt, sigurohuni që të jeni të shpejtë në pranimin e gabimeve tuaja sapo t'i kuptoni ato. Njerëzit do t’a admirojnë ndershmërinë tuaj dhe ndershmëria frymëzon besimin.

2.   Tregojini gabimet në një mënyrë të dobishme, dhe indirekte. Nëse është e nevojshme të theksohen gabimet e dikujt tjetër, sigurohuni që ta bëni atë në një mënyrë konstruktive dhe pozitive. Gjëja e fundit që dëshironi të bëni, është që një person tjetër të ndihet i vogël ose budalla. Nëse jeni i përulur dhe i matur në korrigjimin tuaj, do të zbuloni se komentet tuaja kanë më shumë gjasa të dëgjohen dhe t’i kenë për zemër.  

• Nëse po ndihmoni një person të shmangë një situatë të sikletshme, provoni të thoni: "Edi, më duket se po përdor pirunin e pjatës kryesore, për të ngrënë sallatën. Nuk ka shumë rëndësi, por mund të fillosh duke i përdorur pirunët e vendosur nga jashtë dhe të vazhdosh t’i marrësh me radhë, sipas rendit të pjatave. Nëse dëshiron mund të shohësh atë që bëj unë”. Të ndihmoni dikë të shmangë situata të sikletshme është nder.
• Nëse po ndihmoni dikë, duke rishikuar një provim ose një raport që ka shkruar, provoni të filloni me një kompliment, para se të tregoni se në disa elementë mund të përmirësohen: "Edi, ke bërë një punë shumë të mirë me këtë detyrë! Ishte me të vërtetë interesante, por unë kam nxjerrë disa informacione, të cilat mendoj se duhet t'i kontrollosh edhe një herë, pasi nuk jam i sigurt nëse janë 100% të sakta".
• Shmangni korrigjimin e njerëzve në një mënyrë të prerë, mospërfillëse, të hapur, të vrazhdë, të çjerrë ose të egërsuar.
• Asnjëherë mos e korrigjoni dikë përpara një personi tjetër. Mbajeni çështjen midis jush.

3.   Krijoni ekspertizën tuaj. Nëse keni njohuri të gjera mbi një temë të caktuar, ja vlen ta bëni të ditur këtë fakt, veçanërisht nëse kjo njohuri mund të përdoret potencialisht për të ndihmuar dikë tjetër. Mos u mburrni për njohuritë tuaja, ose mos flisni për të pambarim. Kjo do t'ju bëjë të dukeni sikur i dini të gjitha dhe do t'i dekurajojë njerëzit që t'ju kërkojnë ndihmë. Bëni të ditura njohuritë tuaja dhe tregojuni njerëzve se jeni të gëzuar t'i ndihmoni, nëse është e nevojshme.

• Nëse e bëni të ditur se jeni një ekspert model për financën, miqtë tuaj mund të vijnë tek ju për udhëzime monetare ose këshilla. Ata mund të ndjehen më të kënaqur, që do të vijnë tek dikush që e njohin dhe i besojnë.
• Nëse jeni folës i rrjedhshëm i një gjuhe të dytë, le ta dinë miqtë që do të jeni të kënaqur t'i mësoni ata, përpara provimit të ardhshëm.

4.   Jetoni një jetë të pastër, të cilës ja vlenë t'i hedhësh sytë. Nëse doni të ndikoni tek njerëzit, është e rëndësishme që të jetoni atë lloj jete, përmes të cilës njerëzit mund t'ju respektojnë dhe t'a shohin. Duhet të jetoni plotësisht jetën, dhe të jeni personi më i mirë që mund të jeni. Disa mënyra për të arritur këtë, përfshijnë:

• Mbajtja e një pune të mirë.
• Kujdesi për pamjen dhe paraqitjen tuaj.
• Ushqimi i shëndetshëm dhe të ushtruarit e aktiviteteve sportive.
• Shmangia e abuzimit me drogën dhe alkoolin.
• Të pasurit e interesave dhe pasioneve.
• Respektimi i të tjerëve.

5.   Tregoni gatishmëri për të mësuar. Megjithëse të pasurit e mendimeve dhe besimeve të forta është një tipar i admirueshëm, është gjithashtu e rëndësishme t'a jeni mendjehapur dhe të gatshëm të provoni gjëra të reja, si dhe të mësoni nga përvojat tuaja.

• Përpiquni t'i zgjeroni horizontet tuaja. Merrni pjesë në diskutime stimuluese dhe mendimtare, lexoni libra dhe gazeta, udhëtoni sa më shumë që të jetë e mundur.
• Jini një person i cili thotë PO. Nëse dikush ofron t'ju mësojë ose t'ju tregojë diçka të re, pranojeni atë.

Pjesën e tretë dhe të fundit e artikullit do keni mundësinë ta lexoni javën e ardhshme.