Kur diskutohet mbi zhvillimin e tregut në Shqipëri, dhe në veçanti për punën e punonjësit të shitjes, shpesh ofroj shembuj ose argumenta nga jashtë, por, opinionet e para janë që këtu gjërat paraqiten krejt ndryshe nga vendet e tjera dhe kështu ne nuk mund të përdorim eksperiencën, apo standartet e atyre vendeve. Në fillim edhe unë¹ ndaja pothuajse të njëjtin mendim, por ndërsa lexoja mbi shitjen dhe përpunoja informacionet në trajnime, shikoja se dallimet zhdukeshin. Pastaj, rreth vitit 2009, lexova shkrimin e Jeffrey Gitomer (këtu më poshtë), ku me mjeshtëri tregon se profesioni i shitësit është më shumë njerëzor se sa ka të bëjë me zhvillimin e tregut. Nëse ju mendoni ndryshe, nga ajo që përshkruhet aty, jeni të lutur të na shkruani. 

* * * * *

Sapo bleva në ankand dy artikuj shumë interesantë të cilat kanë lidhje me Babe Ruth, dhe me - qumështin!

Artikulli i parë është një manual për shitësin e qumështit, i vitit 1924, ku paraqitet Babe Ruth. Manuali përmban shumë informacion dhe të dhëna për qumështin, e duket se është projektuar për të edukuar shitësit e qumështit me të gjitha faktet, që ata kanë nevojë të dijnë dhe zotërojnë, mbi produktet e qumështit, për shitjen e tyre shtëpi më shtëpi (rruga e qumështit). Për shembull, a e dinit se një dele jep vetëm 1.2 kg ushqim të ngrënshëm, ndërsa një lopë 8.2 kg? E kapët idenë.

 Lëkura që vesh manualin 96 faqësh (me përmasa 125mm X 178mm) është në formë perfekte.

Artikulli i dytë është një shishe qumështi e vitit 1930. Është e fermës Sunnyhurst Diary me një foto të “The Babe” dhe shkopit të bejzbollit duke reklamuar markën, si zgjedhja e tij. Gjëndja e shishes është pothuajse perfekte. Dhe një e dhënë për reputacionin e Babe për konsumin e alkoolit, një kombinim interesant me produktet “Ruth-iane”!

Në më pak se një minutë, pasi fillova leximin e manualit të trajnimit mbi shitjet, kuptova se manuali mbi 85-vjeçar ishte i lidhur drejtpërdrejt me paranë. Aty, fjalë për fjalë, mësohej shitësi i qumështit si të "milte" klientët e tij – por, bazuar në cilësinë, vlerat, sinqeritetin dhe ekspertizën.

Parathënia thoshte, “Ky libër përmban informacionin më të fundit për metodën më të mirë për shitjen e qumështit. Lexo dhe studio këtë libër me shumë kujdes dhe si përfundim do jesh një shitës më i mirë. Mos provoni ta lexoni këtë libër “me një frymë”. Lexoni pak nga pak, mendoni dhe reflektoni për atë që keni lexuar, dhe shkoni e praktikoni pikat që keni mësuar.

Ky libër do jetë bashkudhëtari juaj i përditshëm, një referencë e gatshme për t’u këshilluar shpesh herë. Studioni pikat kyçe të paraqitura në këtë libër dhe do të pregatisni veten, shumë shpejt, për një punë më të madhe”.

Dhe këtu është një pjesë tjetër e manualit:

Manuali për shitësin e qumështit

Ju si shitës, konsistoni në tre gjëra:

1.     – Të njihni produktet tuaja.

2.     – Të njihni klientët tuaj.

3.     – Të njihni veten tuaj.

Ja disa përkufizime për punën e shitësit, dhe secila nga ato mund t’i shërbejë qëllimit tuaj.

PËRKUFIZIMI NR 1.

Detyra e shitësit është të bindë klientin që të kuptojë pikëpamjen tuaj.

PËRKUFIZIMI NR 2.

Detyrë e shitësit është fuqia për të bindur shumë njerëz për të blerë produktin tuaj me një fitim.

PËRKUFIZIMI NR 3.

Detyrë e shitësit është një përfytyrim mendor - të krijimit të energjisë që rezulton në bindje.

Puna e shitësit është duke u rritur vazhdimisht, dhe problemi në industri nuk është si të prodhosh mallra, por si të mund t’i shpërndash dhe t’i shesësh ato mallra.

Puna e shitësit është një nga punët më me rëndësi në botë.

Doktori duhet të ketë pak aftësi “shitësi”, ose përndryshe nuk do të realizojë shumë të ardhura nga biznesi i tij. Predikuesi duhet të aftësohet edhe si “shitës”, ose përndryshe s’do ti mbushen më vendet. Mësuesi i shkollës duhet të jetë një “shitës” dhe t’ju shesë nxënësve rëndësinë e diturisë, dhe çdo të thotë kur kjo lidhet me karakterin, ose ai do të dështojë dhe shumë shpejt do të fillojë të kërkojë për një punë tjetër.

Një shitës tërheqës është një kombinim i 3 faktorëve:

1.     Veshje e pastër dhe e rregullt.

2.     Një trup i shëndetshëm.

3.     Një kombinim i disa cilësive si entuziazmi, ndershmëria, mirësjellja, me humor të mirë, i gatshëm, simpatik dhe me iniciativë.

1)     Jini entuziast.

2)     Jini i sinqertë.

3)     Jini vetvetja.

4)     Jini i ndershëm.

5)     Jini i qeshur dhe i sjellshëm.

6)     Jini i gatshëm.

7)     Besoni tek vetja.

8)     Kultivoni mendime dobiprurëse.

9)     Vendosni zemrën në punën që bëni.

Në shitje harroje veten tënde. Vetëdija nxjerr në pah sjelljen e njeriut. Mos mendoni për veten, por për gjërat që doni t’i bëni përshtypje klientit. Kultivoni një personalitet të këndshëm dhe një sjellje serioze e të sigurt. Këto cilësi, të kombinuara me një shkallë entusiazmi dhe përkujdesje, krijojnë konfidencën dhe zhvillojnë interesin.

E kuptuat?  Ky manual duket sikur është shkruar dje. Dhe ka edhe më shumë – 95 faqe idesh dhe nuancash që ndihmojnë shitësin e qumështit në një ditë pune, të shesë më shumë qumësht, dhe të ruajë klientët.

Ata përdorën edhe mbështetjen e disa të tretëve, që deklaronin se qumështi i ndihmoi ata për suksesin që kishin arritur. Në mesin e tyre ishin Babe Ruth –bejzbollist, dhe Xhoni Wiesmuller -notar olimpik, e më vonë edhe Tarzani – në film. Ata shfaqin fëmijët, qentë, dhe çdo shembull të mundshëm, se duke përdorur qumësht, ju do të jeni të shëndetshëm dhe të suksesshëm, dhe pa të, të dështuar e të dobët.

Aty gjithashtu flitet edhe për rëndësinë e shërbimit dhe se si është e lidhur kjo me suksesin. Manuali jep një formulë suksesi: CILËSI (përsosmëria e shërbimit) plus SASI (sasia e shërbimit të dhënë) plus SJELLJE (mënyra e sjelljes në dhënien e shërbimit). Provojeni këtë sot.

Ajo që gjithmonë më çudit, është që ky informacion kaq i vjetër, është ende shumë i ri. Në ndryshim nga makinat, telefoni celular, televizioni, laptop-i dhe interneti, këtu gjërat janë pothuajse të njëjta.

¹ (Edmond Norra – Themelues i ProspecTime, GCA - Gitomer Certified Advisor).