Aftësia për të komunikuar mirë është një aftësi e rëndësishme për çdo person, kudo që është ai, e në veçanti, zotërimi i aftësive të shkëlqyera të komunikimit vlerësohet shumë gjatë punës. Kjo reflektohet në ndërtimin e marrëdhënieve me kolegët, superiorët dhe vartësit, si dhe me klientët tuaj. Në punën tuaj, ndoshta ju duhet të bëni edhe prezantime, ku paraqitja e qartë dhe e saktë e ideve është tepër e rëndësishme. Në artikullin më poshtë, me autore Patricia Fripp - eksperte mbi Aftësitë e Prezantimit, ju mund të merrni disa këshilla, për ta bërë prezantimin tuaj të paharrueshëm. Lexim të këndshëm!

* * * * *

Disa prezantues janë aq të pavëmendshëm, sa që mendojnë se sa më gjatë të flasin, aq më shumë vlerë po japin, ose që fitojnë më shumë pikë. Në të vërtetë, audiencat e çdo madhësie, prej 5 deri në 500 persona, janë të etura për përmbajtjen, kjo e paraqitur në mënyrë sa më efikase dhe memorizuese që të jetë e mundur.

Këtu janë tetë këshilla për ta bërë mesazhin tuaj të paharrueshëm:

1. Ndërtoni raportin
2. Bëni që mesazhi juaj të jetë i vlefshëm
3. Hiqni "mbulesat" dhe "ujrat"
4. Sa kohë keni?
5. Kush është audienca juaj?
6. Cila është ideja juaj kryesore?
7. Mos jini të sjellshëm... shkoni drejt në temë
8. Logjika shet, por kur është afër emocioneve 

Ndërtoni raportin.

 Kur ndërtojmë raportin me audiencën tonë, ne duhet të lidhemi emocionalisht dhe intelektualisht. Mendoni për këtë në këtë mënyrë: logjika ju bën të mendoni, emocioni ju bën të veproni. Ju lidheni intelektualisht me argumentin tuaj përmes specifikave dhe statistikave logjike. Ndoshta grafikët dhe diagramet. Ju lidheni emocionalisht përmes kontaktit të syve, tregimit dhe përmbajtjes, që krijon një imazh në mendjen e audiencës, duke përdorur një gjuhë të fokusuar më shumë tek "Ju" - sesa tek "Unë". Kjo është jashtëzakonisht e rëndësishme nëse doni të shisni idetë, produktin ose shërbimin tuaj.

Bëni që mesazhi juaj të jetë i vlefshëm.

Sa i vlefshëm është mesazhi juaj? Ja një këndvështrim për ta parë atë. Bëni një prezantim dhe masni kohën. Ose, nëse është shumë i rëndësishëm, mund edhe ta transkriptoni atë. Për ta bërë edhe pak më argëtuese, llogarisni ndikimin financiar të propozimit tuaj, ose investimin e klientit tuaj, dhe pjestojeni me minutat (ose fjalët) e prezantimit tuaj. Kjo ju jep një vlerë në parà, për secilën minutë ose fjalë tuajën.

Hiqni "mbulesat" dhe "ujrat".

Natyrisht që ju doni të hiqni të gjitha "mbulesat" ose "ujrat" e panevojshme. Për shembull, shmangni klishetë e tilla, si "çdo njëri prej jush në dhomë". Sa shpesh e keni dëgjuar këtë nga prezantuesit, duke shtuar gjashtë fjalë të panevojshme? Kur mesazhi juaj është i qartë dhe konciz, ndajeni sipas sasisë së kohës që nevojitet, për të dhënë prezantimin tuaj. Pas kësaj vëreni se sa më e vlefshme bëhet çdo fjalë. Bëni që të vlejë çdo fjalë!

Këtu është një shembull real:

Një nga miqtë e mi ishte menaxher shitjesh në një hotel në San Francisko. Ai ishte një shitës shumë i mirë në takimet kokë më kokë, por tani ai ishte duke u përballur me një grup prej dhjetë personash. "Jam shumë nervoz," - më tha ai, "Si mund të shes para kaq shumë njerëzve?" Një shoqatë profesionale po diskutonte për të zhvilluar konventën e saj në qytet.

Sa kohë keni?

- "Pa prit pak," - i thashë, "Sa kohë keni për prezantimin tuaj?"

- "Shtatë minuta" - tha ai.

Kush është audienca juaj?

- "Kush është audienca juaj?" - e pyeta,

- "Komiteti i konventës" - u përgjigj ai.

Cila është ideja juaj kryesore?

- "Dhe, në të vërtetë, çfarë jeni duke "shitur'?" - e pyeta.

- "Epo, nuk është hoteli, sepse nëse ata vijnë në San Francisko, ata patjetër do të përdorin hotelin tonë. Mendoj se po shes San Francisko-n, sepse ata po konsiderojnë seriozisht edhe San Diego-n" - u përgjigj.

Pastaj i bëra një pyetje që bëhet rrallë: "Sa i kushton hotelit tuaj nëse e fitoni këtë aktivitet të tyre?"

- "Gjysmë milion dollarë," - tha ai.

"Hmm,"  thashë, duke marrë në dorë makinën llogaritëse. "Pa të shohim: Gjysmë milionë dollarë të ndarë në shtatë minuta, i bie 1.041,66 dollarë për një sekondë, madje edhe kur pushon së foluri".

Pastaj e pyeta - si do të fillonte fjalën e tij, nëse do t'i lihej atij në dorë? Menaxheri i shitjeve mori frymë thellë dhe filloi: "Pra, zonja dhe zotërinj, unë shpresoj që ju po e shijoni mikpritjen tonë dhe unë e di..." dhe ai po vazhdonte me një tufë fjalësh të mërzitshme.

Mos jini të sjellshëm... shkoni drejt në temë.

- "Ju jeni shumë i sjellshëm," - i thashë, kur ai mbaroi, - "dhe kjo nuk është një gjë e keqe, por ju nuk keni shumë kohë dhe ata e dinë se kush je, sepse ti ke punuar me ta. Bëje prezantimin që të flasë rreth tyre."

- "Kur të filloni, pse nuk thoni:

'Mirësevini dhe ju falënderoj për mundësinë që t'ju pres. Në shtatë minutat e ardhshme, do të zbuloni pse vendimi më i mirë që ju mund të merrni, për anëtarët tuaj dhe shoqatën tuaj, është të sillni konventën tuaj në San Francisko dhe në hotelin tonë.

Vini re, këtu keni gjashtë "Ju" ose "tuaja" dhe vetëm një "tonë".

Pastaj thuaj:

- "San Diego është një destinacion i mrekullueshëm, dhe ju patjetër duhet të shkoni atje në të ardhmen. Megjithatë, këtë vit ju duhet të vini në San Francisko sepse... " - dhe listoni arsyet specifike.

- "Kjo është një hapje emocionale për shkak se është e fokusuar drejt "ju", dhe, se ju nuk e hidhni poshtë konkurrencën tuaj, pasi jeni duke pranuar se San Diego është i mrekullueshëm".

- "Ju mund të argumentoni se është pak herët për këto komente në hapje, sepse audienca është ende duke zënë vend dhe nuk është përqendruar tek ju. Kjo mund të jetë e vërtetë, por mos lejoni që të bëhet një justifikim. Shkoni në krye të sallës dhe prisni derisa ju të keni vëmendjen e tyre, duke mbajtur një vështrim të fortë dhe të gëzuar dhe duke i ftuar që të heshtin. Nëse është e nevojshme, thoni frazën e hapjes së fjalës tuaj, dhe pastaj pushoni, derisa të gjithë sytë të jenë të fokusuar tek ju, në pritje të pjesës tjetër të fjalisë".

Logjika shet, por kur është afër emocioneve.

- "Vazhdoni prezantimin tuaj me stimuj logjikë, por përfundoni me emocione. Mos harroni se fjalët e fundit zgjaten dhe qëllimi juaj është të jesh i paharrueshëm".

- "Mendoni se pas disa vitesh, kur të pranishmit tuaj të jenë ulur në një holl konvente, duke kujtuar për konventat më të mira ku ata kanë marrë pjesë, dhe, fillojnë të flasin për përvojën e tyre në San Francisko, në hotelin tuaj. Dhe ju e dini që keni qenë pjesë e asaj përvoje, sepse keni marrë pjesë në komitetin e organizimit".

Tani, ju keni tetë këshilla që e shtojnë vlerën e fjalëve tuaja dhe e bëjnë mesazhin tuaj të paharrueshëm. Përdoreni modelin e mikut tim se si të lidheni emocionalisht në fillim dhe në fund të një prezantimi, dhe të lidheni intelektualisht në mes të tij. Plus, ju do t'i bëni fjalët më të vlefshme.

Paçi fat! Prezantimet bindëse ju japin avantazhin konkurrues.