Për herë të parë po sjellim një artikull (nga Colleen Francis) rreth Marketingut, e në veçanti për një formë sa të vjetër dhe aq të nevojshme si "Fjala gojë-më-gojë". Reklama e "Fjalës gojë-më-gojë", është e rëndësishme për çdo biznes, pasi çdo klient i kënaqur (për të qenë më të saktë, çdo klient besnik), mund të ndikojë tek dhjetra të tjerë që të vijnë drejt jush. Fakt është që kjo formë marketingu ndodh pavarësisht nga ju, në të dyja drejtimet: klientët e kënaqur mund t'ju rekomandojnë, dhe klientët e pakënaqur i largojnë të tjerët nga ju. Dhe në të dy rastet, kjo është një nga format më të besueshme të reklamimit, pasi ai person rrezikon reputacionin e tij, çdo herë që bën një rekomandim, dhe më e rëndësishmja ai person nuk fiton asgjë, përveç një lloj vlerësimi nga ata që e dëgjojnë. Çfarë po bëni për të nxitur "Fjalën gojë-më-gojë" dhe që të tjerët të ndjehen të sigurt që t'ju rekomandojnë ju? Lexim të këndshëm!

* * * * *

Marketingu përmes “Fjalës gojë-më-gojë” është sot një nga mjetet më të fuqishme në shitje, por megjithatë mbetet thellësisht e keqkuptuar dhe e nën-përdorur.

Në punën time të trajnimeve të thelluara mbi shitjet, në Amerikë dhe jashtë saj, edhe kur punoj me profesionistë me përvojë - takoj shumë persona të cilët nuk mund ta shpjegojnë plotësisht “Fjalën gojë-më-gojë”, si ta krijojnë, apo pse funksionon. Edhe kur ata kanë përfituar më parë drejtpërdrejt nga kjo, ata përpiqen të identifikojnë se si ndodhi kjo.

Gjithçka që dinë është se “Fjala gojë-më-gojë” ekziston dhe se është e rëndësishme për ta patur. Kjo përgjigje është shumë e pamjaftueshme.

Ajo që është e rëndësishme nuk i lihet kurrë në dorë rastësisë

Ashtu si të gjitha aspektet e marketingut, “Fjala gojë-më-gojë” nuk është diçka që thjesht ju ndodh. Është rezultat i hapave të qëllimshëm të projektuar për të prodhuar një rezultat të parashikuar. Mos harroni: në marketing nuk ekziston rastësisht një gjë e tillë si për shembull - një rrjet lidhjesh.

“Fjala gojë-më-gojë” ka kuptim vetëm nëse ju krijoni diçka për veten tuaj. Përndryshe, ajo është vetëm një çështje shansi apo fati. Dhe fati vjen e ikën. Por, biznesi juaj dhe karriera profesionale meritojnë më shumë se kaq.

Kur njerëzit, të cilët kanë punuar me ju, thonë gjëra të mrekullueshme për përvojën e fituar, ju duhet të keni dijeni të plotë se kush po flet, çfarë po thonë, pse ata po e thonë dhe si mund ta plotësoni këtë mesazh.

Duke u bazuar në atë që kemi trajtuar më parë mbi zhvillimin e statusit me klientët tuaj, le të shohim se si mund të ndërtojmë një rrjet të qëllimshëm brenda territorit tuaj të shitjeve, për të krijuar kushte ideale që “Fjala gojë-më-gojë” të lulëzojë.

Përcaktoni qartë çfarë nënkuptohet me fjalën e gojës

Përcaktoni se çfarë “fjale” dhe tek “goja” e kujt do të kalojë, kur bëhet fjalë për ndarjen e një përvoje, apo si është të bësh biznes me ju.

Ju dëshironi që klientët tuaj më të mirë të jenë ata që po e tregojnë këtë histori, kështu që strategjia juaj për ”Fjalën gojë-më-gojë” duhet të fokusohet drejtpërdrejt mbi klientët. Në përcaktimin e klientëve kryesorë, identifikoni përfitimet kryesore që ju ofroni çdo herë. Këto përfitime janë ato, për të cilat doni që ata të flasin me të tjerët. Mbani parasysh se duhet t’i dokumentoni rastet, ose t'i ftoni ata që të bëjnë deklarime dhe që i mbështesin këto përfitime kryesore.

Jini rregullisht në vendet e duhura

Të jesh i kudogjendur është vetëm një nga elementët e strategjisë së ”Fjalës gojë-më-gojë”. Ju nuk mund të krijoni momentin e duhur nëse nuk shfaqeni rregullisht. Madje edhe atëherë, nuk ka asnjë kuptim të krijoni strategjinë e “Fjalës gojë-më-gojë”, nëse klientët nuk përshtaten mirë me biznesin tuaj.

Zgjidhni vendndodhjet e duhura, duke u fokusuar në audiencën e synuar. Kjo përfshin menaxhimin e markës suaj në mënyrë sociale dhe profesionale. Nëse tregu juaj është i njëjti treg në të cilin ju jetoni, pranoni që blerësit tuaj po krijojnë një ide rreth jush edhe kur jeni jashtë pune, edhe kur jeni në ndeshjen e futbollit të fëmijës suaj, edhe kur jeni në dyqanin ushqimor, ose, edhe kur jeni në një lokal të premten në mbrëmje.

Eliminoni pikat e fërkimit

Klientët tuaj më të mirë, kurrë nuk duhet të ndihen sikur po punojnë, kur është fjala të kontaktojnë me ju. Përndryshe, pse do t'ju rekomandonin tek miqtë e tyre? Shikoni me kujdes se si njerëzit mund t'ju kontaktojnë juve. A keni një email të shkurtër? A jeni lehtësisht i gjetshëm, nëpërmjet emrit, në LinkedIn, Twitter dhe Facebook? A keni disa numra telefoni të cilat janë programuar t’i drejtojnë telefonuesit në postën zanore, apo keni një numër të vetëm për klientët tuaj? Nëse jeni një biznes me përmasa të vogla, a ka faqja juaj e internetit një mënyrë të thjeshtë, që e vendos lexuesin tuaj në kontakt të drejtpërdrejtë me ju, me përpjekjen më minimale? Nëse jeni pjesë e një kompanie më të madhe, a keni roje, portierë apo pengesa të tjera, të cilat i ndalojnë njerëzit që t'ju arrijnë drejtpërsëdrejti? Eliminoni çdo pikë të mundshme fërkimi.

Bëhuni një autoritet në fushën tuaj.

Nëse doni që klientët tuaj më të mirë t'ju rekomandojnë, mos u bazoni gjithmonë vetëm tek përvoja e mirë e shërbimit që ofroni. Jepuni atyre një arsye më shumë. Provoni se jeni ekspert në fushën tuaj.

Flisni në takimet apo eventet e industrisë ku bëni pjesë. Shkruani dhe prodhoni video, të cilat mësojnë se si bëhen gjërat dhe postoni buletine. Sigurohuni që të mos i harroni ngjarjet lokale të biznesit, si dhe ngjarjet në universitete dhe shkolla.

Jini atje për të shërbyer, jo për të shitur

Duke e vendosur veten si një autoritet i besuar, pas kësaj duhet të jeni të qartë për motivin tuaj. Jini atje për t'u shërbyer njerëzve, për t'i ndihmuar bujarisht në problemet e tyre. Bëhuni udhëheqësi që ata po kërkojnë të kenë. Shitja për ta është dytësore. Nëse motivi juaj është shitja, njerëzit do t’a kuptojnë këtë, dhe më shumë do t’i largoni sesa do t’i afroni të tjerët. Kjo përfshin edhe rastet kur duhet një punë ekstra nga ju. Bëjeni atë për të bërë ndryshimin, jo për të marrë diçka mbrapsht, përndryshe njerëzit do ta kuptojnë situatën menjëherë.

Të shërbyerit me bujari, do të thotë të jesh i përgatitur të udhëheqësh nëpërmjet shembullit. Ofroni rrjetin tuaj të referencave për shërbime profesionale ose personale. Klientët më të mirë do t’ju thonë shpejt: "Ju duhet të takoheni me..." dhe pastaj i prezantoni klientët e tyre me klientë të rinj, të mundshëm. Në fillim, ndihmoni të tjerët. Në këtë mënyrë ju ndihmoni veten.

“Fjala gojë-më-gojë” është një rrjet i qëllimshëm. Ju duhet ta zgjidhni atë për veten tuaj dhe ta nxisni që t'ju japë rezultatet që ju nevojiten, në mënyrë që biznesi juaj të mund të lulëzojë. Duke ndjekur hapat që janë përshkruar këtu, do të krijoni kushtet ideale që ajo të hedhë rrënjë dhe të rritet.